काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शनिबार हुने दोस्रो चरणको खेलमा त्रिभुवन आर्मी क्लब र च्यासल युवा क्लब भिड्दैछन् । खेल हल्चोकस्थित एपीएफ रंगशालामा दिनको २:३० बजे सुरु हुनेछ ।

लिगको पहिलो चरणमा च्यासलले अपेक्षित सुरुवात गर्न सकेन । मछिन्द्रसँग गोलरहित बराबरीमा रोकिँदा च्यासलका हेमन्त थापामगरले पेनाल्टीमा गोल गर्न चुकेका थिए । आर्मी पनि पहिलो खेलमा बराबरीमा नै रोकिएको थियो । आर्मीका मिडफिल्डर सन्तोष तामाङले इन्ज्युरी समयमा फ्रिकिक गोल गरेपछि एनआरटीविरुद्ध २-२ को बराबरी गर्न सफल भएको थियो । त्यसअघि पनि आर्मी खेलमा पछाडी पर्दा सन्तोषले पेनाल्टीमार्फत नै बराबरी गोल फर्काएका थिए ।

आर्मी दशैं र तिहारको बिचमा प्रशिक्षणमा नै व्यस्त रहयो । यता च्यासलले भने नवलपरासीमा आयोजित राइनो गोल्डकपमा सहभागिता जनायो । ए डिभिजनको उपाधि आकांक्षी पुलिसलाई फाइनलमा टाइब्रेकरमा पराजित गर्दै च्यासलले उपाधि नै जित्यो । तर च्यासलले बुधबार सेमिफाइनल खेलेपछि बिहीबारै फाइनल खेलेको थियो । शुक्रबार साँझ मात्र राजधानी आइपुगेको टोलीले शनिबार आर्मीको सामना गर्दैछ ।

च्यासलका प्रशिक्षक राजुकाजी शाक्य टोलीमा केहि थकान भएपनि टोली जितको लागि नै खेल्ने बताए । ‘ हामीले हिजो र अस्ति लगातार खेल खेल्यौं । आज पनि हामी यात्राकै क्रममा रहयौँ । खेलाडी थकित छन् तर जितको लागि कुनै कसर छाड्दैनौं,’ उनले भने । प्रतियोगिताको उपाधि जित्नुले टोलीलाई केहि हौसला बढेको उनले बताए ।

शाक्यले पहिलो खेलमा बराबरीमा रोकिएपनि खासै घाटा नहुने बताए । ‘लिगको पहिलो खेल कठिन नै हुने थाहा थियो । अवसर पनि पाएका थियौं तर जित निकाल्न सकेनौं । पहिलो खेल भएकाले खासै असर नपर्ला, अन्य खेलमा राम्रो नतिजा निकालेर त्यसलाई पूर्ति गर्न तत्पर छौं,’ उनले भने ।