एजेन्सी – खराब नतिजाको सिलसिलालाई तोड्दै पूर्व विश्वविजेता जर्मनीले अन्तर्राष्ट्रिय मैत्रीपूर्ण खेल अन्तर्गत बिहीबार राती रुसलाई ३-० ले पराजित गरेको छ ।

लाइप्जिगमा भएको खेलमा नियमित टोलीका मुख्य खेलाडीबिना पनि जर्मनीले प्रभावशाली प्रदर्शन गर्दै सहज जित दर्ता गर्यो । विश्वकप टोलीमा स्थान बनाउन नसकेका युवा विंगर लेरोय सानेले जर्मनीलाई आठौं मिनेटमा अग्रता दिलाएका थिए । उनले सर्ज ग्नाब्रीको पासलाई गोलमा परिणत गरेका थिए ।

खेलको २५ औं मिनेटमा जर्मनीले अग्रता दोब्बर पार्यो । रुसले बनाएको अफसाइड ट्रयापलाई जर्मनीले तोड्दा डिफेन्डर निक्लास सुलले गोल गरे । उनले जोसुआ किमिचको कर्नरमा आएको बललाई एन्टोनियो रुडीगरले फ्लिक गरेपछि सहजै गोल गरेका थिए । ४० औं मिनेटमा आर्सनलका पूर्व खेलाडी ग्नाब्रीले गोल गर्दै पहिलो हाफमा ३-० को अग्रता दिलाए ।

दोस्रो हाफमा पाहुना टोली रुसले सुधारिएको प्रदर्शन गर्यो । एलेक्से इओनोभले रुसलाई खेलमा फर्काउने सुवर्ण अवसर प्राप्त गरेपनि उनको प्रहार पोस्टभन्दा थोरै बाहिर जाँदा जर्मनीले अग्रता बचायो । खेलको अन्त्यतिर एलेक्जेन्डर एरोखिनले जोनास हेक्टरमाथि डरलाग्दो ट्याकल गर्दा हेक्टरले चोट बोक्दै मैदान छाड्नुपर्यो ।

यस नतिजासँगै सन् २०१९ मा जर्मनीले खेलेका १२ खेलमा यो चौथो जित हो । विश्वकपमा खराब प्रदर्शन गर्दै समूह चरणबाट नै बाहिरिएको जर्मनीलाई यस जितले केहि राहत पुगेको छ । जर्मनीले अब यूईएफए नेसन्स लिगअन्तर्गत खेलमा सोमबार नेदरल्यान्ड्सको सामना गर्नेछ । रुसले भने स्विडेनसँग खेल्ने कार्यक्रम रहेको छ ।