बेम्वली (एजेन्सी) – सर्वाधिक गोलकर्ता वाइन रुनीको बिदाई खेलमा इंग्ल्यान्डले अन्तर्राष्ट्रिय मैत्रीपूर्ण खेलमा अमेरिकालाई पराजित गरेको छ ।  वेम्बली स्टेडियममा बिहिबार राति भएको खेलमा इंग्ल्यान्डले अमेरिकालाई ३–० ले सहजै पराजित गरेको हो  ।

बिदाई खेलमा बेन्चबाट दोस्रो हाफमा मैदान प्रवेश गरेका रुनीले इंग्ल्यान्डको कप्तानको जिम्मेवारी सम्हालेको खेलमा जेसे लिङ्गार्ड, ट्रेन्ट एलेक्सन्डर अर्नाेल्ड र क्यालम विल्सनले गोल गरे । खेलको २५औं मिनेटमा डेल अलीको पासमा जेसेले गोल गर्दै इंग्ल्यान्डलाई अग्रता दिलाएका थिए ।

त्यसको २ मिनेटपछि नै जाडन सान्चोको पासलाई ट्रेन्ट एलेक्सन्डर अर्नाेल्डले गोल गरेपछि इंग्ल्यान्डले पहिलो हाफमा २–० को अग्रता बनाएको थियो । ७७औं मिनेटमा विल्सनले गोल गर्दै इंग्ल्यान्डलाई ३–० को सहज जित दिलाए । उनले डेब्यु खेलमै गोल गर्न सफल भए ।

यसअघि नै सन्यासको घोषणा गरेको रुनीले अमेरिकाविरुद्धको खेलको दोस्रो हाफमा मैदान प्रवेश गरेको थिए । रुनी ५८ मिनेटमा गोलकर्ता जेसे लिङ्गार्डको स्थानमा मैदान प्रवेश गरेका थिए ।

रुनीले पछिल्लोपटक सन् २०१६ मा भएको विश्वकप छनोट अन्तरगतको स्कटल्यान्डविरुद्धको खेलपछि राष्ट्रिय टिमबाट बाहिर रहेका थिए । मार्च २०१७ पछि राष्ट्रिय टिममा नपरेपछि उनले अगस्टमा अन्तर्रा्ष्ट्रिय फुटबलबाट सन्यासको घोषणा गरेका थिए ।

म्यानचेस्टर युनाइटेड र एभर्टनका ३३ वर्षीय पूर्व फरवार्ड रुनी हाल अमेरिकाको डिसी युनाइटेडमा आवद्ध छन् । रुनीले इंग्ल्यान्डको राष्ट्रिय टिमबाट बिदाई खेल खेल्नुअघि ११९ खेलबाट ५३ अन्तर्राष्ट्रिय गोल गरिसकेका थिए । अमेरिकाविरुद्धको च्यारिटी खेल भर्खरै स्थापना भएको वाइन रुनी फाउन्डेसनको सहयोगार्थ रहेको थियो ।