जाग्रिव (एजेन्सी) – विश्व उपविजेता क्रोएसियाले यूईएफए नेसन्स लिग अन्तर्गत बिहीबारको खेलमा पूर्व विश्व विजेता स्पेनलाई पराजित गरेको छ । प्रतिस्पर्धात्मक खेलमा क्रोएसियाले स्पेनलाई ३–२ ले पराजित गरेको हो ।

क्रोएसियालाई जिताउन टिन जेडभाजले २ तथा एन्ड्रिज क्रामारिकले १ गोल गरे । स्पेनका ड्यानियल सेवालस र सर्जियो रामोसले गोल गरे । क्रोएसियाको घरेलु मैदान माकसिमिरमा बिहिबार राति भएको भएको खेलको पहिलो हाफ गोलरहित बराबरीमा सकिएपनि दोस्रो हाफमा पाँच गोल सम्भव भएको थियो ।

खेलको ५४औं मिनेटमा एन्ड्रिज क्रामारिकले इभान पेरिसिकको पासमा गोल गर्दै घरेलु टोलीलाई शुरुवाती अग्रता दिलाएका थिए । तर, त्यसको दुई मिनेटपछि नै ड्यानियल सेवालेसले इस्कोको पासलाई सदुपयोग गर्दै खेललाई १–१ गोलको बराबरीमा ल्याएका थिए ।

६९औं मिनेटमा टिन जेडभाजले कप्तान लुका मोड्रिचको पासलाई गोलमा परिणत गरेपछि क्रोएसियाले खेलमा फेरि २–१ को अग्रता लिएको थियो । ७८औं मिनेटमा स्पेनले पेनाल्टी गोलमार्फत खेललाई पुनः बराबरीमा ल्याउन सफल भयो । क्रोएसियाका भर्साल्जकोले डि–बक्समा ह्यान्ड गरेपछि स्पेनले पेनाल्टीको मौका पाएको थियो । जसलाई कप्तान सर्जियो रामोसले चुकाएनन् ।

बराबरीतर्फ धकेलिएको खेलको इन्जुरी समयको थप गरिएको तेस्रो मिनेटमा टिन जेडभाजलेले गोल गर्दै क्रोएसियालाई ३–२ को सघंर्षपूर्ण जित दिलाए । जितपछि समुह ४ मा रहेको क्रोएसियाले दोस्रो चरण पुग्ने सम्भावनालाई बलियो बनाएको छ । क्रोएसियाको ४ अंक रहँदा पराजित स्पेनको ६ अंक तथा इंग्ल्यान्डको ४ अंक रहेको छ । सबै तीन टोलीको दोस्रो चरण पुग्ने सम्भावना जीवित नै रहेको छ ।