एजेन्सी – एसियाली राष्ट्र कतारले अन्तर्राष्ट्रिय मैत्रीपूर्ण खेलमा युरोपेली राष्ट्र स्विटजरल्यान्डलाई १-० ले पराजित गरेको छ । बुधबार राती भएको खेलमा कतारका लागि अक्रम अफिफले ८६ औं मिनेटमा विजयी गोल गरेका थिए ।

फिफा वरियतामा ९६ औं स्थानमा रहेको कतारले आफूभन्दा ८८ स्थान माथि आठौं स्थानमा रहेको स्विटजरल्यान्डमाथि पहिलो जित दर्ता गरेको हो । अफिफले नियमित समय सकिनुभन्दा ४ मिनेट अगाडी गोल गर्दै जित पक्का गरे । कतारका मिडफिल्डरले मैदानको मध्यभागमा बल खोसेपछि दिएको थ्रु बलमा अफिफले गोलरक्षक भोन वोगोलाई छक्याउँदै खाली पोस्टमा गोल गरेका थिए ।

सन् २०२२ मा फिफा विश्वकप आयोजना गर्न जुटेको कतारले पछिल्लो समय ठूला राष्ट्रसँग मैत्रीपूर्ण खेल खेल्दै आफ्नो टोलीलाई तयार गर्दै आइरहेको छ । कतारका प्रशिक्षक फेलिक्स स्यान्चेजले यस जितले टोलीको मनोबल अझै बढ्ने बताए । ‘यो नतिजाले हाम्रो टोलीको मनोबल बढेको छ । ठूला टोलीसँग गरेको मिहिनेतले हाम्रो स्टार पनि बढेको छ । हामीलाई एसियन कपको तयारीमा यस्तो नतिजाले निकै सहयोग पुगेको छ,’ उनले भने ।

विश्वकपको अन्तिम १६ मा पुगेको स्विटजरल्यान्डले घरेलु मैदानमा पछिल्लो १० खेलमा ९ क्लिन सिट राखेको थियो । पछिल्ला खेलमा स्विटजरल्यान्डले पानामा र आइसल्यान्डलाई ६-६ गोल प्रहार गरेको थियो । यस खेलमा पनि स्विटजरल्यान्डलाई बलियो टोलीको रुपमा हेरिएको थियो । स्टार खेलाडी जेर्दान साकिरीले दोस्रो हाफमा मैदान प्रवेश गरेपनि टोलीलाई जित दिलाउन सकेनन् ।

कतारले अब सोमबार हुने मैत्रीपूर्ण खेलमा आइसल्यान्डको सामना गर्नेछ । कतारले जनवरी २०१९ मा हुने एसियन कपमा प्रतिस्पर्धा गर्दैछ । अर्को वर्ष ब्राजिलमा हुने कोपा अमेरिकाको लागि पनि कतार आमन्त्रित टोलीको रुपमा सहभागिता जनाउँदैछ ।