सन सेबास्टियन (एजेन्सी)– प्रशिक्षक जोसे माउरिन्होले आफ्नो क्षमतालाई पूर्ण रुपमा प्रदर्शनको अवसर नदिएको म्यानचेस्टर युनाइटेडका पूर्व खेलाडी एडनान यानुजाईले बताएका छन् ।

डेभिड मोयजले युनाइेड सम्हाल्दा बेल्जियन युवा खेलाडीले प्रभावशाली प्रदर्शन गरेका थिए । जसका कारण उनलाई युनाइटेडमा रायन गिग्सको उत्तराधिकारीका रुपमा समेत हेरिएको थियो ।

तर, सन् २०१७ मा माउरन्होले युनाइटेड सम्हालेपछि यानुजाईले खासै मौका पाएनन् । तर, पोर्चुगाली प्रशिक्षक माउरिन्हाले आफ्ना विषयमा धैर्यता नराखेको यानुजाईले गुनासो गरेका छन् । युनाइटेडको छवि अनुसारको प्रदर्शनका लागि आफुमा पर्याप्त क्षमता रहेको पनि उनले प्रष्ट पारेका छन् ।

‘मैले माउरिन्होको समयमा खासै मौका पाइन । उनी सम्भवत नाम चलेका अनुभवी खेलाडीलाई बढी चाहन्थे,’ उनले थपे, ‘तर मलाई कुनै समस्या छैन । मैले युनाइटेड छाडे र स्पेन आए । म यहाँ खुसी छु । तर मलाई थाहा थियो युनाइटेडमा खेल्ने स्तर मसँग थियो । आफनो क्षमता मलाई थाहा छ ।’

उनको गुनासो त्यतिमा रोखिएन । ‘उनीहरुले मलाई धेरै मौका दिएनन्,’ हाल रियल सोसिडाडमा खेलिरहेका उनले भने, ‘केहि छैन । म स्पेनमा खुसी छु र आफ्नो खेलमा रमाइरहेको छु ।’ प्रिमियर लिगमा युनाइटेडको कमजोर प्रदर्शनका विषयमा समेत बोलेका यानुजाईले विजय लयमा फर्कन सुझाव पनि दिएका छन् ।

‘युनाइटेड उत्कृष्ट टोली हो र यसका समर्थक पनि त्यति नै उत्कृष्ट छन् । तर अहिले संघर्ष गरिरहेको छ,’ उनले भने, ‘खेल जित्नका लागि उनीहरुले सहि निर्णय लिन आवश्यक छ । अहिले संघर्ष गर्नुका पछाडि धेरै कारण छन् । त्यसैले उनीहरुले सहि निर्णय लिन जरुरी छ ।’ प्रिमियर लिगका १२ खेलमा युनाइटेड आठौं स्थानमा रहेको छ । शीर्षस्थानको म्यानचेस्टर सिटीभन्दा युनाइटेड १२ अंकले पछाडि छ ।