एजेन्सी – अर्जेन्टिनाका पूर्व कप्तान एवं पूर्व प्रशिक्षक डिएगो म्याराडोनाले रियल म्याड्रिडका नवनियुक्त प्रशिक्षण सान्टियागो सोलारीले क्लबमा सफलता हात पार्न नसक्ने बताएका छन् ।

रियल म्याड्रिडले एल क्लासिकोमा बार्सिलोनासँग ५-१ ले पराजित भएपछि पूर्व प्रशिक्षक जुलेन लोपेटेगुईलाई बर्खास्त गरेको थियो । उनको स्थानमा रियलले एकेडेमीका प्रशिक्षक सान्टियागो सोलारीलाई कार्यवाहक प्रशिक्षकको जिम्मेवारी सुम्पिएको थियो । तर कार्यवाहकका रुपमा उनले खेलाएको चार खेलमा चारै ओटामा जित दर्ता गरेपछि क्लबले उनलाई १८ महिनाको सम्झौतामा अनुबन्धन गरेको हो ।

म्याराडोनाले भने सोलारीलाई रियलको जिम्मेवारी सुम्पिनुलाई अर्जेन्टिनी राष्ट्रिय टोलीमा जोर्गे सम्पओलीको बहिर्गमनपछि लिओनेल स्कालोनीलाई कार्यवाहक सुम्पनुसँग दाँजे । ‘दुवै ठाउँमा उचित मान्छेलाई जिम्मेवारी दिइएको छैन । दुवै ठाउँमा सम्बन्धित क्लब र संघको अध्यक्षले भनेको भरमा जागिरमा नियुक्ति दिइएको हो,’ म्याराडोनाले भने, ‘ प्रशिक्षकको जिम्मेवारी सहज हुँदैन । केहि नतिजाको भरमा स्तर थाहा हुने हैन । यसको लागि धेरै मिहिनेत चाहिन्छ ।’

रियलले भने यसअघि पनि एकेडेमीका प्रशिक्षकलाई जिम्मेवारी सुम्पंदा सफलता हात पारेको इतिहास छ । रियलले यसअघि जिनेदिन जिदानलाई सोलारीझैं जिम्मेवारी दिंदा उनले लगातार तीन च्याम्पियन्स लिग उपाधि जिताएका थिए । म्याराडोनाले जिदानको बेलामा भने स्थिति अहिलेभन्दा फरक रहेको बताए ।

‘ जिदानको बेलामा स्थिति फरक थियो । अहिले सोलारी वा स्कालोनीले जिदानझैं सफलता प्राप्त गर्न सक्छन जस्तो मलाई लाग्दैन,’ उनले भने । हाल मेक्सिकन क्लब डोराडोसको प्रशिक्षक रहेका म्याराडोनाले आफूले रियलको प्रस्ताव पाएको भए स्वीकार्ने पनि बताए । ‘म खुसी साथ प्रस्ताव स्वीकार्थे । म त्यस दबाब झेल्न तयार पनि छु । तर प्रस्ताव मलाइ आएन र म यहाँ मेक्सिकोमा नै खुसी छु ।’