बार्सिलोना (एजेन्सी)– बार्सिलोनाका महान् खेलाडी आन्द्रेस इनिएस्टाले ब्राजिलियन फरवार्ड नेयमार भविष्यमा रियल म्याड्रिडमा आबद्ध भएपनि त्यसले आफुलाई कुनै असर नगर्ने बताएका छन् । इनिएस्टाले नेयमार स्पेन फर्केर रियलमा आबद्ध हुँदा आफूलाई रिस पनि नउठ्ने र चित्त पनि नदुख्ने बताएका छन् ।

यो सिजनको सुरुवातमा क्रिस्टियानो रोनाल्डोले छोडेपछि रियलले नेयमारलाई भित्राउन चाहेको चर्चा चलेको थियो । ब्राजिलियन नेयमार बार्सिलोनाबाट गत सिजन विश्व कीर्तिमान रकममा पेरिस सेन्ट जर्मेन (पिएसजी) पुगेका थिए । उनी अझै केहि समय पिएसजीमै बस्ने अनुमान गरिएको छ ।

यद्दपी २६ वर्षे सुपर स्टारलाई भित्राउनेमा रियलका अध्यक्ष फ्लोरेन्टिनो पेरेज अझै आशावादी रहेको बताइएको छ । इनिएस्टा र नेयमारले संयुक्त रुपमा बार्सिलोनालाई थुप्रै सफलता दिलाएका थिए । इनिएस्टा पनि नेयमार रियल जाने सक्ने सम्भावना देख्छन् ।

‘यदि उनी रियल गए भने त्यसलाई मलाई दुःखी बनाउने छैन, ‘ विश्वकप विजेता समेत रहेका स्पेनिस इनियएस्टाले थपे, ‘बार्सिलोनामा उत्कृष्ट खेलाडीहरु छन् । हरेक सिजन टोलीले उपाधिका लागि प्रयास गरिरहेको हुन्छ । तर भविष्यमा नेयमार बार्सिलोना कहिल्यै फर्कने छैनन् भन्ने पनि होइन ।’

यद्दपी नेयमार बार्सिलोना फर्कने त्यति सहज नभएको उनको भनाई छ । ‘उनी विश्वस्तरीय खेलाडी हुन् । जसको उपस्थितिमा टोलीको प्रदर्शनमा फरक पर्नेछ,’ उनले भने, ‘तर मलाई लाग्छ उनी फर्कने सम्भवना कम छ । तर, कुनै पनि विषयलाई पूर्ण रुपमा अस्वीकार गर्न सकिन्न । ‘

भविष्यमा इनिएस्टा आफैं पनि बार्सिलोना फर्कने विषयमा आशावादी देखिएका छन् । लामो समय बार्सिलोनामा बिताएका इनिएस्टाले भने, ‘ मेरो लागि जे ठिक रहन्छ त्यो जिम्मेवारीमा म बार्सिलोना फर्कन चाहन्छु । हुन सक्छ भविष्यमा पहिलो टोलीलाई प्रशिक्षण गर्ने गरि जान पनि सक्छु ।’