लन्डन (एजेन्सी) – इंग्लिस प्रिमियर लिग क्लब फुलहमले लेस्टर सिटीका पुर्व प्रशिक्षक क्लाउडियो रानेरीलाई मुख्य प्रशिक्षकमा नियुक्त गरेको छ । फुलहमले बुधबार स्लाभिसा जोकानोभिचलाई बर्खास्त गर्दै इटालियन रानेरीलाई मुख्य प्रशिक्षकको रुपमा नियुक्त गरेको हो ।

स्लाभिसा जोकानोभिचको प्रशिक्षणमा लगातार खराब प्रदर्शन गरेपछि क्लबले उनलाई बर्खास्त गरेको हो । स्लाभिसा सन् २०१५ मा क्लबको प्रशिक्षक बनेका थिए । रानेरीले क्लबसँग लामो समयको लागि सम्झौता गरेको क्लबले जनाएको छ । फुलहमका अध्यक्ष साहिद खानले जोकानोभिचलाई क्लबलाई पछिल्लो तीन वर्षसम्म क्लबमा पु¥याएको योगदानको कदर गर्दै धन्यवाद दिएका छन् ।

प्रिमियर लिगको १२ खेल सकिंदा फुलहम ५ अंक जोडेर पुछारमा रहेको छ । फुलहमले १ खेलमा जित हात पार्दा २ खेलमा बराबरी र ९ खेलमा हारको नतिजा भोगेको थियो । फुलहमले पछिल्लो सबै ६ लिग खेलमा हार बेहोरेको थियो । फुलहम पछिल्लोपटक लिभरपुलसँग २–० ले पराजित भएको थियो ।

रानेरीको प्रशिक्षणमा लेस्टर सिटीले सन् २०१५/१६ को सिजनमा अविश्वनीय रुपमा प्रिमियर लिगको उपाधि जितेको थियो । प्रिमियर लिग च्याम्पियन बनेको अर्काे वर्ष खराब प्रदर्शन गरेपछि उनलाई क्लबले बर्खास्त गरेको थियो । उनी पछिल्लो समय फ्रेन्च लिग वान क्लब नान्टेसको प्रशिक्षक रहेका थिए । फुलहमले २४ नोभेम्वरमा घरेलु मैदानमा साउथह्याम्पटनसँग खेल्दैछ ।