एजेन्सी – बार्सिलोना र रियल म्याड्रिड फुटबल जगतकै दुई कट्टर प्रतिद्वन्दी हुन् । तर, इतिहास पल्टाएर हेर्दा केही नाम यस्ता छन् जसले दुवै टोलीबाट सहभागिता जनाएका छन् । तीमध्ये ४ चर्चित नामहरु यस प्रकारका छन्:

४. लुइस फिगो

पोर्चुगलका सुपरस्टार फिगो सन् १९९५ मा बार्सिलोना आएका थिए । उनले कतिपय खेलहरुमा बार्सिलोनाको कप्तानी पनि गरे । तर, सन् २००० मा फिगो बार्सा छोड्दै रियल लागेका थिए । त्यति बेला रियलमा सरुवा हुंदा उनी संसारकै महंगा खेलाडी पनि थिए ।

३. लुइस एन्रिके

सन् १९९१ देखि १९९६ सम्म रियल म्याड्रिडबाट खेलेका एन्रिकेको रियलसंग सम्झौता अघि नबढ्नाले उनी बार्सिलोनातर्फ लागे । सन् १९९६ देखि २००४ सम्म बार्साबाट खेलेका उनी पछि गएर बार्सिलोनाको प्रशिक्षक समेत भए । अहिले उनी स्पेन राष्ट्रिय टोलीको प्रशिक्षक छन् ।

 २. माइकल लड्र्प

लड्रप आफ्नो पुस्ताको उत्कृष्ट खेलाडीहरु मध्येका एक मानिन्छन् । सन् १९८९ मा युभेन्टसबाट बार्सिलोना आएका लड्र्पले त्यहां ६ वर्ष बिताए । सन् १९९४ देखि १९९६ सम्म रियल म्याड्रिडबाट खेलेका लड्रपले सन् २०१२ देखि २०१४ सम्म प्रशिक्षकका रुपमा इंग्लिस टोली स्वान्सी सिटी पनि सम्हालेका थिए ।

१. रोनाल्डो

ब्राजिलका रोनाल्डो फुटबल जगतकै उत्कृष्ट फरवार्डका रुपमा हेरिन्छन् । १९९६-९७ को सिजनमा बार्सिलोनाबाट खेल्दै उनले कैयौं रेकर्डहरु आफ्नो नाममा गरेका थिए । बार्साबाट ३७ खेलमा उनले ३४ गोल गर्न सफल भएका थिए । त्यसपछिको सिजन इन्टर मिलानमा सरुवा भएका उनी सन् २००२ मा फेरी स्पेनिस लिगमा फर्के, तर यस पटक बार्साको चिरपरिचित प्रतिद्वन्दी रियल म्याड्रिडसंग ।

चोटका कारण धेरै खेल गुमाउन परे पनि उनले रियलमा १ सय २७ खेलमा ८३ गोल गरे । दुवै प्रतिद्वन्दिहरुबाट खेले पनि दुवै टोलीका समर्थकहरुले उनलाई उत्तिकै रुचाएको पाइन्छ जसले रोनाल्डोको महानता पनि स्पष्ट पार्छ ।