एजेन्सी – पेरिस सेन्ट जर्मेन र फ्रान्सका युवा स्टार किलियन एमबाप्पेले समर्थकहरुले उनलाई पेलेसँग तुलना गरेकोमा खुसी भएपनि आफू पेलेजस्तो हुन नसक्ने बताएका छन् ।

एमबाप्पेले पछिल्लो सिजन उत्कृष्ट प्रदर्शन गर्दै फ्रान्सलाई विश्वकप जिताएपछि उनलाई पेलेसँग दाँजेर हेर्न थालिएको थियो । विश्वकप फाइनलमा उनले विजयी गोल पनि गरेपछि उनी टिनएजमै यस्तो सफलता हासिल गर्ने पेलेपछिका पहिलो खेलाडी बनेका थिए । १९ वर्षीय एमबाप्पेले पेलेसँग दाँज्दा खुसी भएपनि उनीजस्तो खेलाडी बन्न भने कल्पना बाहिर रहेको बताए ।

‘ म निकै खुसी छु । तर यो निकै कठिन कुरा पनि हो ।मलाई लाग्दैन कि कसैले पेलेले आफ्नो जमानामा खेलेजस्तो खेल्न सक्छ । पेले एक्ला छन् जसले त्यो सबै गर्न सक्छ,’ उनले भने, ‘म यो दाँजोमा धेरै भिजन चाहन्न । मलाई थाहा छ कि कोहि पनि पेलेजस्तो बन्न सक्दैन ।’

१९ वर्षको कलिलो उमेरमा नै एमबाप्पेले दुई लिग उपाधि र विश्वकप उपाधिसँगै अन्य धेरै सफलता हात पारिसकेका छन् । अब उनको लक्ष्य पीएसजीलाई च्याम्पियन्स लिग जिताउनु रहेको छ । तर त्यहाँसम्म पुग्ने उनले व्यक्तिगत रुपमा र टोलीले धेरै मिहिनेत गर्न बाँकी रहेको उनले स्वीकारे ।

‘नयाँ मालिक आएपछि क्लबले निकै प्रगति गरेको छ । तर च्याम्पियन्स लिग उपाधि जित्न यसले पुग्दैन, हामीले अझै मिहिनेत गर्नुपर्छ,’ उनले भने, ‘ क्लबले आफ्नो पाटोमा सबै पक्ष राम्रो तरिकाले पुर्याएको छ । हामी खेलाडीले पनि त्यसै गर्नुपर्छ र प्राकृतिक रुपमा नै एउटा लय आउँछ । यहि तरिकाले अगाडी बढ्ने र क्षमता अनुसार प्रदर्शन गर्यौं भने हाम्रो लक्ष्य पुरा हुनेछ ।’