काठमाडौं (हाम्रो खेलकुद) – टोकियो ओलम्पिक २०२० महिला फुटबल अन्तर्गत एएफसीको प्रारम्भिक छनोट प्रतियोगितामा नेपाल र बंगलादेशको खेल चलिरहेको छ । नेपालले पहिलो हाफमा १-० को अग्रता लिएको छ ।

म्यानमारको यांगोनस्थित थुनुवा रंगशालामा नेपालको लागि कप्तान निरु थापाले गोल गरेकी हुन् । उनले १७ औं मिनेटमा गोल गर्दै नेपाललाई अग्रता दिलाएकी हुन् । नेपालले यो अग्रता बचाएको खण्डमा दोस्रो चरणमा स्थान पक्का गर्नेछ । नेपालले सुरुवाती २ खेलमा २ बराबरी खेल्दै २ अंक जोडिसकेको छ ।

नेपालले लगातार तेस्रो खेलमा अग्रता लिएको हो । यसअघि भारत र म्यानमारविरुद्ध पनि नेपालले अग्रता लिएर बराबरी गोल खाएको थियो । समुहको अन्तिम खेलमा यसपछि भारत र म्यानमार भिड्नेछन् । नेपालको समूहमा कुन स्थान हुनेछ भन्ने टुङ्गो त्यस खेलको नतिजाले तय गर्नेछ ।

सन् २०२० मा हुने टोकियो ओलम्पिक छनोटमा १८ देशको सहभागिता छ । सहभागी टिमलाई ४ समूहमा विभाजन गरिएको छ । भिएतानाम र उज्जेकिस्तान वरियताका आधारमा दोस्रो चरणका लागि छनोट भैसकेका छन् । हरेक समूहका शीर्ष दुई टोली र अन्य दुई उत्कृष्ट तेस्रो हुने टोली दोस्रो चरणमा प्रवेश गर्नेछन् । दोस्रो चरणका खेलहरु अप्रिलमा हुनेछ ।

दोस्रो चरण छनोटबाट तीन टोली तेस्रो चरणमा प्रवेश गर्नेछन् । तेस्रो चरणमा ८ टिमबीच प्रतिस्पर्धा हुनेछ । दोस्रो चरणका तीन विजेतासँगै अष्ट्रेलिया, चीन, थाइल्याण्ड, दक्षिण कोरिया र उत्तर कोरियाले तेस्रो चरणमा प्रतिस्पर्धा गर्नेछन् । दुई समूहका उत्कृष्ट दुई टोलीले चौथो चरणमा स्थान बनाउनेछन् । चौथो चरण प्रवेश गर्न सफल चार टोलीलाई दुई समूहमा विभाजन गरी होम एण्ड अवेको आधारमा प्रतिस्पर्धा गराइनेछ । जसबाट विजयी हुने दुई टिम ओलम्पिकका लागि छानिनेछन् ।