म्यानचेस्टर (एजेन्सी)– पोउल पोग्बाको अनुपस्थितिले म्यानचेस्टर युनाइटेडको मिडफिल्डमा समस्या आउने र उनकै अनुपस्थिति डर्बीमा सिटीसँग हारको एउटा कारण रहेको म्यानचेस्टर युनाइटेडका पूर्व खेलाडी ग्यारी नेभिलले बताएका छन् । आइतबार म्यानचेस्टर डर्बीमा जोसे माउरिन्होको युनाइटेड सिटीसँग ३–१ ले पराजित भएको थियो ।

नेभिलका अनुसार यदि त्यो खेलमा पोग्बा हुन्थे भने त्यसले युनाइटेडलाई फाइदा पुग्न सक्थ्यो । चोटका कारण फ्रान्सेली पोग्बाले सो खेल गुमाएका थिए उनको ठाँउ माराउने फेलाइनीले लिएका थिए । पोग्बाको पास र भिजनका लागि स्तरीय मानिन्छन्, उनको अनुपस्थितिमा युनाइटेडले एउटा मात्र गोल गर्न सकेको थियो ।

खेलपछि युनाइटेडका पूर्व खेलाडी नेभिलले टोलीमा मिडफिल्डको महत्वका बारेमा बताएका थिए । ‘युनाइटेडका मिडफिल्डले बल अगाडि पास दिन सकेनन् । टोली प्रिमियर लिग उपाधि जित्न गइरहेको छैन । अगाडिका तीन खेलाडीमा लिभरपुल र सिटीमा जस्तो प्रभावकारिता देखिदैन,’ नेभिलले भने,’ अन्य टोली भन्दा युनाइटेड सबै पक्षमा पछाडि परिरहेको छ । अन्य टोली उपाधिका लागि प्रयास गरिरहेका छन्, तर त्यसको दाँजोमा युनाइटेड आसपास पनि छैन । ‘

पोग्बाको तारिफमा नेभिलले भने, ‘पोग्बा त्यस्ता एक खेलाडी हुन् । जो विश्वको कुनै पनि मैदानमा कुनै पनि खेलाडीका अगाडि खेल्न सक्छन् । उनी आफ्नो क्षमता र स्तरमा विश्वास राख्छन् । उनी टोलीलाई अगाडि बढाउने क्षमता राख्छन् । राम्रो पास खेल्न सक्छन् । ‘

पोग्बा नहुँदा आइतबारको खेलमा युनाइटेडलाई असर परेको उनको बुझाई थियो । ‘उनीले नखेल्दा युनाइटेडमा निकै ठूलो समस्या देखियो । नेमान्जा माटिच, फिलाइनी र आन्देर हरेराले कसरी खेल्छन् भन्नेमा म सोचिरहेको हुन्छु ,उनले थपे, ‘तर, उनीहरुले राम्रो गर्नसकेको छैनन् । पोग्बाविना फिका देखिएका छन् ।’