म्याड्रिड (एजेन्सी)– रियल म्याड्रिडका गोलकिपर थिबाउट कोर्टियसले आफु करिम बेन्जेमाको प्रदर्शनबाट खुसी रहेको बताएका छन् । स्पेनिस ला लिगामा आइतबार सेल्टा भिगोलाई रियलले ४–२ ले हराउँदा फ्रान्सेली बेन्जिमाले पनि गोल गरेका थिए ।

राम्रो गर्दा गर्दा पनि बेन्जेमा अनावश्यक ओलोचना खेल्नु परेको उल्लेख गर्दै कोर्टियसले भनेका छन्, ‘धेरैले उनको मेहनतको बेवास्ता गर्दै आलोचना गर्छन् । गोल नगरेको भन्दै सञ्चारमाध्यम र समर्थकले उनको धेरै आलोचना गरिरहेका हुन्छन् । तर उनले टोलीलाई निकै सहयोग गरेका छन् । मौका सृजना गरेका छन् । म त उनीसँग एकदमै खुसी छु ।’

बार्सिलोनासँगको एल क्लासिको ५–१ ले पराजित भएपछि रियलले जुलेन लोपेटेगुइलाई बर्खास्त गरेको थियो । त्यसपछि रियलले सान्टियागो सोलारीलाई अन्तरिम प्रशिक्षकका रुपमा नियुक्त गरेको छ । उनी अन्तरिम प्रशिक्षक भएसँगै रियलले लगातार ४ खेल जितेको छ । कोर्टियसले टोलीको जितले खेलाडीको मनोबल उच्च रहनेमा जोड दिएका छन् । ‘अघिल्ला खेलहरु हामीले चाहे जस्तो हुन सकेन,’ उनले भने, ‘हाम्रो स्तरमा परिवर्तन भएको छैन । टोलीमा परिवर्तन भएको छैन । तर लगातार जितले टोलीको मनोबल बढाएको छ ।’

कोर्टियसले क्लबका गोलकिपरको अवस्थाका बारेमा कुरा गर्दै अर्का गोलकिपर केलोर नाभाससँगको सम्बन्ध राम्रो रहेको बताएका छन् । ‘ प्रशिक्षकलाई रोज्न कठिन होस् भन्नेका लागि हरेक दिन हामी राम्ररी अभ्यास गरिरहेका हुन्छौं,’ उनले भने, ‘रियलमा हरेक पोजिसनमा स्तरीय खेलाडी छन् । त्यसैले धेरै प्रतिस्पर्धा छ । हामी एकअर्कासँग प्रतिस्पर्धा गरिरहेका हुन्छौं ।’