काठमाडौं (हाम्रो खेलकुद) – मिडफिल्डर प्रकाश बुढाथोकीलाई ए डिभिजन क्लब मनाङ मर्स्याङदी क्लबले लिगको लागि अनुबन्धन गरेको छ । भुटानमा सम्पन्न राष्ट्रिय लिगमा पारो युनाइटेडबाट खेलेका प्रकाश यसै महिना नेपाल फर्केका हुन् ।

प्रकाशले भुटानमा राम्रो प्रदर्शन गर्दै पारोलाई पहिलो सहभागितामै उपविजेता बन्न मदत गरेका थिए । उनी लिगको एक खेलमा म्यान अफ द म्याच पनि भएका थिए । अन्तिम खेलमा जित दर्ता गर्न नसक्दा पारो उपविजेतामा सिमित भएको थियो । उनले  भुटान बसाइमा क्लबका लागि ३ गोल पन गरे । प्रकाश यसअघि नेपालमा थ्री स्टार क्लबसँग अनुबन्धित थिए । राष्ट्रिय टोलीका सदस्य रहिसकेका प्रकाश पछिल्लो समय चोटका कारण टोलीमा परेका छैनन् ।

सन् २०१६ को दक्षिण एसियाली खेलकुदअन्तर्गत फाइनल खेलमा भारतविरुद्ध प्रकाशले फ्रिकिकमार्फत बराबरी गोल फर्काएका थिए । उनी बंगबंधु कप जित्ने टोलीका पनि सदस्य थिए । त्यसपछि भएको एएफसी सोलिडारिटी कपमा भने चोटका कारण उनी राष्ट्रिय टोलीमा पर्न सकेका थिएनन् । त्यसयता घरेलु प्रतियोगिता नहुँदा उनी राष्ट्रिय टोलीमा पर्न सकेका छैनन् ।

प्रकाशले राष्ट्रिय टोलीमा फर्कने लक्ष्यसहित मनाङमा अनुबन्धित भएको हाम्रोखेलकुदलाई बताए । ‘ मैले चोटका कारण राष्ट्रिय टोलीमा पर्न सकिन । तर अहिले राम्रो लयमा छु । भुटानमा पनि लिग च्याम्पियन हुने नजिक पुगेर सफल भएनौं । मनाङमा अनुबन्ध भएपछि अब राष्ट्रिय टोलीमा फर्कने लक्ष्य लिएको छु,’ उनले भने । प्रकाशले मनाङसँग हाल ६ महिनाको लागि अनुबन्धन गरेका हुन् । यसअघि फ्रेन्ड्स क्लबबाट ए डिभिजन लिग फुटबल खेलिसकेका प्रकाशले मोफसलका प्रतियोगिताहरुमा संकटाबाट पनि खेलेका थिए ।