एजेन्सी – स्पेनिस ला लिगा अन्तर्गत आइतबार रोयल म्याड्रिडले सेल्टा भिगोलाई ४-२ ले पराजित गरेको छ । यस नतिजासँगै रियलले शीर्षस्थानको बार्सिलोनासँग अंकको दुरीलाई  ४ अंकमा झारेको छ ।

रियलका लागि करीम बेन्जेमाले २३ औं मिनेटमा गोलको खाता खोलेका थिए । उनले लुका मोड्रीचको पासलाई सदुपयोग गर्दै गोल गरे । दोस्रो हाफको ५६ औं मिनेटमा बेन्जेमाको शक्तिशाली प्रहार पोस्टमा लागेर फर्कंदा डिफेन्डर गुस्ताभो कब्राललाई लाग्दै गोलमा परिणत भयो । लगत्तै सेल्टाले पनि गोल फर्कायो । ह्युगो माल्लोले उत्कृष्ट भली प्रहार गर्दै अग्रता १ गोलमा झारे ।

रियलका लागि कप्तान सर्जियो रामोसले ८३ औं मिनेटमा पेनाल्टीमार्फत गोल गरे । इन्ज्युरी समयको पहिलो मिनेटमा ड्यानी सेबालोसले गोल गर्दै रियललाई ४-१ को फराकिलो अग्रता दिलाए । ब्रेस मेन्डेजले अन्तिम मिनेटमा गोल फर्काएपनि त्यो सान्त्वना गोलमा सिमित भयो । रियलले सान्टियागो सोलारीलाई कार्यवाहक प्रशिक्षकमा नियुक्त गरेयता क्लबको यो लगातार चौथो जित हो ।

ला लिगाको नियमअनुसार कुनैपनि प्रशिक्षकलाई १४ दिनसम्म मात्र कार्यवाहकको भूमिका दिन पाइन्छ । रियलले सोमबार नै सोलारीलाई स्थायी प्रशिक्षकको रुपमा नियुक्त गर्ने सम्भावना रहेको छ । रियल अंक तालिकामा १२ खेलमा २० अंकसहित छैटौं स्थानमा रहेको छ । शीर्षस्थानको बार्सिलोनाले १२ खेलमा २४ अंक जोडेको छ ।