एजेन्सी – बार्सिलोना कप्तान लिओनेल मेसी आइतबार ला लिगाअन्तर्गत बार्सिलोना र रियल बेटिसको खेलमा पहिलो रोजाइमा परेका छन् । उनले सुआरेज र माल्कमसँग मिलेर बार्सिलोनाको अग्रपंक्ति सम्हाल्नेछन् ।

बार्सिलोनाको गोलरक्षकमा मार्क आन्देर टेर स्टेगन रहेका छन् । डिफेन्समा जेरार्ड पिके र क्लेमेन्ट लेङलेट छन् भने साइड डिफेन्सको जिम्मेवारी जोर्डी अल्बा र सर्जी रोबर्टो छन् । मिडफिल्डमा सर्जियो बुस्केट्स, आर्थर मेलो र इभान राकिटिच खेल्नेछन् । आक्रमणमा कप्तान लिओनेल मेसीलाई लुइस सुआरेज र माल्कमले साथ दिनेछन् ।

अक्टोबर तेस्रो साता लिग खेलमा चोट बोकेका मेसीको अनुपस्थितिमा बार्सिलोनाले ५ खेल खेलेको थियो । त्यसमध्य बार्सिलोना ४ खेलमा विजयी रहयो भने पछिल्लो खेलमा इन्टर मिलानसँग १-१ को बराबरीमा रोकियो । यसबीचमा बार्सिलोनाले एक क्लासिकोमा रियल म्याड्रिडलाई ५-१ को फराकिलो अन्तरले पराजित गर्यो । उक्त खेलमा लुइस सुआरेजले ह्याट्रिक पनि गरेका थिए ।

मेसीले बेटिसविरुद्ध खेल्ने पक्का भएसँगै बार्सिलोनाको समस्या केहि सुल्झिएको छ । यस खेलका लागि फिलिपे कोउटिन्हो चोटका कारण अनुपस्थित रहनु र प्रशिक्षक एर्नेस्टो भालभेर्डेले ओस्मान डेम्बेलेलाई टोलीमा नसमेट्दा आक्रमण केहि कमजोर हुने आँकलन गरिएको थियो । आक्रमणमा लुइस सुआरेज र मेसी उपस्थित भएसँगै यो चिन्ता भने सकिएको छ ।