काठमाडौं (हाम्रो खेलकुद) – टोकियो ओलम्पिक २०२० को एसिया क्षेत्रको महिला फुटबलको छनोट चरणको प्रारम्भिक चरणमा नेपाली राष्ट्रिय महिला फुटबल टोलीले समूहको दोस्रो खेलमा आयोजक म्यानमारसँग खेलिरहेको छ । पहिलो हाफको समाप्तिमा खेल १-१ को बराबरीमा छ ।

नेपालले खेलको सुरुवाती मिनेटमा अग्रता लिएपनि त्यसलाई बचाउन सकेन । नेपालको लागि खेलको दोस्रो मिनेटमा सावित्रा भण्डारीले पेनाल्टीमा गोल गर्दै अग्रता दिलाएकी थिइन् । तर खिन मो वाईले १३ औं मिनेटमा गोल गर्दै खेल बराबरीमा ल्याइन । वाईले प्रहार गरेको कर्नर नेपाली गोलरक्षक एन्जिला तुम्बापो सुब्बाले रोक्ने प्रयास गर्दा सिधै गोलमा परिणत भएको थियो ।

त्यसअघि भएको समूह चरणको खेलमा भारतले बंगलादेशलाई ७-१ को फराकिलो अन्तरले पराजित गरेको थियो । भारतका लागि बालादेवीले ४, कमला देवीले २ तथा संजुले १ गोल गरिन् । बंगलादेशको लागि कृष्णा रानीले सान्त्वना गोल गरेकी थिईन । नेपालले पहिलो खेलमा भारतसँग १-१ को बराबरी खेलेको थियो । बंगलादेश भने म्यानमारसँग पहिलो खेलमा ५-० ले पराजित भएको थियो ।

नेपालले यस खेलमा जित दर्ता गरेमा अर्को चरणमा पुग्ने सम्भावना बलियो हुनेछ । बराबरी भएको खण्डमा अन्य खेलको नतिजाको आधारमा नेपालको छनोट सम्भावनाको समीकरण तयार हुनेछ ।