एजेन्सी – अर्जेन्टिनी डिफेन्डर जुआन फोइथले एकमात्र गोल गरेपछि इंग्लिस प्रिमियर लिगअन्तर्गत शनिबार क्रिस्टल प्यालेसको मैदानमा टोटेनहम हट्सपर १-० ले विजयी भएको छ ।

अघिल्लो साता प्रिमियर लिगमा डेब्यु गरेका फोइथले वोल्भ्सविरुद्ध २ पेनाल्टी दिएपछि आलोचनाको शिकार भएका थिए । तर प्यालेसविरुद्ध डिफेन्समा उत्कृष्ट प्रदर्शनसँगै विजयी गोल पनि गरेपछि भने उनलाई प्रशिक्षक माउरिचियो पोचेटिनोले प्रशंसा गरेका छन् । २० वर्षीय डिफेन्डरले ६६ औं मिनेटमा ह्यारी केनले गरेको हेडर विपक्षी खेलाडीलाई लागेर आएपछि आफैंले हेड गर्दै पोस्टको दिशा दिएका थिए ।

यता प्यालेसले पछिल्लो ७ खेलमा जित दर्ता गर्न सकेको छैन । घरेलु टोलीका लागि जेफ्री स्लपले अन्तिम समयमा उत्कृष्ट प्रयास गरेपनि कप्तान ह्युगो लोरिसले त्यसलाई विफल तुल्याए । स्पर्सकै पूर्व खेलाडी आन्द्रोस टाउनसेन्ड र एलेक्जेन्डर सोरोलोथले पनि पाएको मौका सदुपयोग गर्न सकेनन् । यस नतिजासँगै प्यालेस लिग तालिकाको १६ औं स्थानमा छ । गोल अन्तरको आधारमा मात्र प्यालेस रेलिगेसन क्षेत्रभन्दा माथि छ ।

स्पर्सले भने १२ खेलमा २७ अंक जोड्दै अंक तालिकामा फड्को मारेको छ । तालिकाको चौथो स्थानमा भएपनि स्पर्स सिटीभन्दा २ अंक पछाडी छ । दोस्रो र तेस्रो स्थानमा रहेका चेल्सी र लिभरपुलको पनि समान २७ अंक नै छ । यद्यपी खेलमा स्पर्सका लागि केहि चिन्ता गर्ने ठाउँ रहयो । डिफेन्डर काइरान ट्रीपीएर र मिडफिल्डर एरिक लामेला चोटका कारण मैदान छाड्न बाध्य रहे ।