म्यानचेस्टर (एजेन्सी)– डेभिड सिल्भाले स्पेनिस राष्ट्रिय फुटबल टोलीबाट सन्यास लिने बताएका छन् । पाँच महिनामा जन्मेर जीवनका लागि संघर्ष गरिरहेका छोरालाई समय दिने भन्दै सिल्भाले सन्यास लिने निर्णय गरेका हुन् ।

सिल्भाले पछिल्लो सिजन अधिकांश समय भ्यालेसिन्याको अस्पतालमा छोरासँग बिताएका थिए । उनले पछिल्लो जुलाईलाई आफ्नो जीवनको सबैभन्दा कठिन समय रहेको बताएका छन् । सिल्भाले ३२ वर्षको उमेरमा स्पेनिस टोलीबाट विश्राम लिएका छन् । आइतबार हुने बोस्नियाविरुद्धको मैत्रीपूर्ण खेलमा सम्मानका लागि उनले नै किकअफ गर्ने भएका छन् ।

‘मेरो परिवार अझै पनि खेलोस् भन्ने चाहन्थे । तर म बढी भन्दा बढी छोरासँग बिताउन चाहन्छु । त्यसले राष्ट्रिय टोलीसँग म यात्रा गर्न असमर्थ छु, ‘ उनले भनेका छन् । सिल्भाले म्यानचेस्टर सिटीमा भने अहिलेको सम्झौताको अन्त्यसम्म बस्ने संकेत गरेका छन् ।

सन् २०२० सम्म उनको सम्झौता सिटीसँग रहेको छ । उनले खेल जीवनको अन्त्य भने स्पेनिस क्लब लास पालमासबाट गर्न चाहेका छन् । यद्दपी अब उनको त्यो योजना पुरा हुनेमा पनि शंका देखिएको छ ।

‘अब के हुन्छ । म अहिले भन्न सक्दिन । मैले अझै डेढ बर्ष सिटीमा खेल्नुछ । तर पनि सबै चिज हामीले चाहे जस्तो हुँदैन । परिस्थिति बदलिन्छ ,’ उनले भने, ‘ म हरेक समय आनन्द लिन चहान्छु । पछि के हुन्छ त्यति बेला नै सोच्नेछु ।’