एजेन्सी – जर्मनी राष्ट्रिय टोलीका प्रशिक्षक जोचिम लोउले यूईएफए नेसन लिग अन्तर्गत नेदरल्यान्डविरुद्ध हुने खेलका लागि टोलीको घोषणा गर्दा बोरुसिया डर्टमुन्डका मार्को रिउसलाई टोलीमा समेटेका छन् ।

जारी सिजन उत्कृष्ट लयमा रहेका रिउसले जर्मनीको खराब फर्मलाई अन्त्य गर्न प्रयास गर्नेछन् । रिउसको उत्कृष्ट प्रदर्शनसँगै डर्टमुन्ड अंक तालिकाको शीर्ष स्थानमा छ । २९ वर्षीय रिउसले हालसम्म यस सिजन क्लबका लागि ६ गोल गरेका छन् । लोउले घोषणा गरेको टोलीमा गोलरक्षक मार्क आन्देर टेर स्टेगन र डिफेन्डर जेरोम बोटेङलाई भने विश्राम दिइएको छ ।

रियल म्याड्रिडका मिडफिल्डर टोनी क्रुस पनि टोलीमा समावेश गरिएका छन् । उनले नोभेम्बर १९ मा नेदरल्यान्डविरुद्ध हुने खेलमा प्रतिस्पर्ध गर्नेछन् । त्यसको ४ दिनपछि जर्मनीले मैत्रीपूर्ण खेलमा रुसको सामना गर्नेछन् । क्रुस उक्त खेलमा भने उपस्थित हुने छैनन् ।

बार्सिलोनाका गोलरक्षक मार्क आन्देर टेर स्टेगन भने काँधमा लागेको समन्य चोटका कारण टोलीमा नपरेका हुन् । उनलाई विश्राम दिने निर्णय प्रशिक्षकले लिएका थिए । यता डिफेन्डर बोटेङले पनि प्रशिक्षकसँग सल्लाह गरेर क्लबमा नै रहेर प्रशिक्षण गर्ने बताएका हुन् । फिटनेसमा समस्या भएका कारण उनले प्रशिक्षकसँग सल्लाह गरेर यस अन्तर्राष्ट्रिय ब्रेकबाट विश्राम लिएका हुन् ।