एजेन्सी – फ्रान्सेली राष्ट्रिय फुटबल टोलीका प्रशिक्षक डीडीएर डेस्च्याम्प्सले युवा फरवार्ड किलियन एमबाप्पेको प्रशंसा गरेका छन् । पेरिस सेन्ट जर्मेन (पीएसजी) बाट व्यवसायिक फुटबल खेल्दै आएका एमबाप्पेले क्लबका लागि सिजनको सुरुवात उत्कृष्ट ढंगले गरेपछि प्रशिक्षकले प्रशंसा गरेका हुन् ।

१९ वर्षीय एमबाप्पेले हालसम्म खेलेका १२ खेलमा १३ गोल र ६ असिस्ट गरिसकेका छन् । रुसमा सम्पन्न फिफा विश्वकप २०१८ मा फ्रान्सलाई उपाधि दिलाउन महत्त्वपूर्ण भूमिका निर्वाह गरेका एमबाप्पेले उक्त प्रतियोगिताको उत्कृष्ट युवा खेलाडीको उपाधि पनि जितेका थिए । यसै प्रदर्शनका कारण उनी ब्यालोन डी’ओर को मनोनयनमा पनि परेका छन् । एमबाप्पे उपाधि दावेदारमध्यका एक खेलाडी हुन् । क्लब फुटबलमा प्रभावशाली प्रदर्शन र अन्तर्राष्ट्रिय टोलीबाट पनि सोहि लय समातेका कारण उनी बलिया दावेदारका रुपमा अगाडी आएका छन् ।

‘किलियनले अचम्मको काम गर्न सक्छन । उनको तथ्यांक हेरेरै पनि धेरै कुरा थाहा पाउन सकिन्छ । उनले क्लब र राष्ट्रिय टोलीका लागि गरेको गोल हेर्नुस । उनले दिएको असिस्ट पनि उत्तिकै राम्रा हुन्छन्,’ प्रशिक्षक डीडीएरले भने, ‘उनी युवा खेलाडी हुन् जो धेरै राम्रो प्रदर्शन गरिरहेका छन् । उनले हामीलाई केहि माग राख्दैनन् । यसका बाबजुद पनि उनले फ्रान्स र पीएसजीको आक्रमणमा नेतृत्व लिने नै भूमिका निर्वाह गरिरहेका छन् ।’

फ्रान्सले यूईएफए नेसन्स लिग अन्तर्गत नोभेम्बर १६ मा नेदरल्यान्ड्सको सामना गर्दैछ । त्यसको ४ दिनपछि मैत्रीपूर्ण खेलमा फ्रान्सले दक्षिण अमेरिकी राष्ट्र उरुग्वेको सामना गर्नेछ । उक्त खेलमा एमबाप्पेले पीएसजीका सहकर्मी एडिन्सन कभानीको सामना गर्नेछन् ।