एजेन्सी – यूईएफए युरोपा लिग अन्तर्गत बिहीबार चेल्सीले बाटे बोरिसोभमाथि १-० को कठिन जित निकालेको छ । यस जितसँगै चेल्सी युरोपा लिगको नकआउट चरणमा प्रवेश गरेको छ ।

चेल्सीको जितमा ओलिभिएर जिरुडले ५२ औं मिनेटमा गरेको गोल निर्णायक सावित भयो । उनले एमर्सनको क्रसमा गोल गर्दै समूह एल मा चेल्सीको शत प्रतिशत नतिजा कायम राखे । जिरुडको यो चेल्सीका लागि ५ महिनापछि पहिलो गोल थियो । उनले प्रशिक्षक माउरिजियो सार्रीको आगमनपछि गोल गर्न सकेका थिएनन् ।

‘ म जिरुडको लागि खुसि छु । स्ट्राइकरहरु गोल गर्न चाहन्छन् । उनको हौसला बढाउन यो गोल निकै महत्त्वपूर्ण सावित हुनेछ,’ सार्रीले भने, ‘ म उनलाई गोलको संख्यालाई लिएर चिन्तित नहुन आग्रह गर्छु । उनले गोल नगरेपनि टोलीमा महत्त्वपूर्ण भूमिका निर्वाह गर्दै आएका छन् ।’

चेल्सीले सन् २०१२ देखि पहिलोपटक लगातार ४ युरोपेली खेल जितेको हो । त्यसबेला चेल्सीले च्याम्पियन्स लिगको उपाधि जितेको थियो । यता माउरिजियो सार्रीले युरोप लिगमा खेलाएका सबै १० खेलमा जित दर्ता गरेका छन् । यसक्रममा उनले २८ गोल गर्दै जम्मा ४ गोल खाएका छन् ।

जितपछि चेल्सी अंक तालिकामा मोल भिडीभन्दा ६ अंकले अगाडी छ । भिडीले बिहीबार नै भएको खेलमा पाओकलाई १-० ले पराजित गरेको हो । चेल्सी ४ खेलमा १२ अंकसहित शीर्ष स्थानमा छ भने भिडीको ६ अंक रहेको छ । पाओक र बाटेको समान ३-३ अंक छ ।