एजेन्सी – स्पेनिस क्लब रियल म्याड्रिडका कप्तान सर्जियो रामोसले च्याम्पियन्स लिगमा बुधबार भएको खेलमा भएको एक घटनालाई लिएर माफी मागेका छन् ।

च्याम्पियन्स लिगको समूह चरणको खेलमा रियलले भिक्टोरिया प्लेजनलाई ५-० ले पराजित गरेको थियो । उक्त खेलमा प्लेजनका मिलान हाभेललाई खेलका क्रममा रामोसको कुइनोले लाग्दा नाक फुटेर रक्ताम्य भएको थियो । खेल गोलरहित बराबरीमा रहेको अवस्थामा रामोस र हाभेल बलका लागि  भिड्दा रामोसको कुइनोले हाभेलको नाकमा लागेको थियो ।

नाकमा चोट लागेपछि हाभेलले पहिलो हाफ समाप्त हुनुभन्दा ७ मिनेट अगाडी मैदान छाडेका थिए । उक्त घटनालाई रेफ्री डेनिस अतेकिनले कुनै कारवाही गरेका थिएनन् । रामोसले पनि उक्त कार्य जानाजान नगरेको बताएका छन् । उनले ट्विट गर्दै हाभेललाई शीघ्र स्वास्थ्य लाभको कामना पनि गरेका छन् ।

‘हामीले जित दर्ता गर्दै अगाडी बढ्ने हो र सिक्ने पनि हो । फुटबलले सधैं केहि कुरा सिकाउँछ । आज मैले त्यसरी आक्रामक भएर जानु नहुने थियो । मेरो सोच मिलानलाई चोट पुर्याउने थिएन । शीघ्र स्वास्थ्य लाभको कामना गर्दछु,’ रामोसले लेखेका छन् ।

यसअघि गत सिजन यूईएफए च्याम्पियन्स लिगको फाइनलमा लिभरपुलका मोहमद सलाहलाई लडाएपछि सलाह घाइते भएका थिए । विश्वकपमा पनि एक खेल गुमाएका सलाहको चोट नै च्याम्पियन्स लिगमा लिभरपुल हार्नुको मुख्य कारक मानिएको थियो । रामोसलाई अझैसम्म पनि सलाहले माफी नदिएको सार्वजनिक कार्यक्रममा नै प्रष्ट देखिएको थियो ।