एजेन्सी – स्पेनिस ला लिगाले इंग्लिस क्लब म्यानचेस्टर सिटी र फ्रान्सेली क्लब पेरिस सेन्ट जर्मेनलाई यूईएफएको आर्थिक नियमावली अवहेलना गरेको भन्दै कारवाही गर्नुपर्ने माग राखेको छ ।

जर्मनीको प्रतिष्ठित पत्रिका डेर स्पीगलका अनुसार सिटी र पीएसजीले प्रयोजन सम्झौतालाई जानाजान बढाएर यूईएफएको आर्थिक नियमवाली मिच्दै प्रतिवेदन सार्वजनिक गरेका छन् । रिपोर्टका अनुसार सन् २०१४ मा हाल फिफाको अध्यक्ष रहेका जियानी इन्फान्टिनो (तत्कालिन यूईएफए महासचिव) ले क्लबहरुलाई न्युनतम कारवाहीको लागि सम्झौता गरेको पनि आरोप लगाएको छ ।

सिटीले उक्त रिपोर्टलाई ‘प्रतिष्ठा गिराउन गरिएको दुष्प्रयास’ को संज्ञा दिंदै नकारेको छ भने पीएसजीले केहि जवाफ दिइसकेको छैन । स्पेनिस ला लिगाको सूचना अधिकारी जोरिस एभार्सले पीएसजी र सिटीले गरेको यस कदमलाई कारवाही गर्नुपर्ने माग राखेका छन् । ‘सिटी र पीएसजीले ठगि गरेको सूचना प्राप्त भएको छ । यूईएफएले यसलाई गम्भीरतापूर्वक लिएर कदम चाल्नुपर्छ । आफैं बनाएको फाइनान्सियल फेयर प्लेको नियमलाई केहि क्लबका बचाउका लागि पछाडी सार्नु हुन्न्, ‘ उनले भने ।

सन् २०१४ मा सिटीले नियमवाली विपरित कार्य गर्दा ४ करोड ९ लाख पाउण्ड जरिवाना तिर्नुपरेको थियो भने सन् २०१४-१५ मा च्याम्पियन्स लिग टोली संख्यालाई घटाइएको थियो । तर सिटीले त्यसपछि नयाँ प्रयोजन ल्याउने क्रममा चलाखी गरेर आफ्नै मालिकको कम्पनिसँग सम्झौता गरेको आरोप छ ।