एजेन्सी – यूईएफए च्याम्पियन्स लिग अन्तर्गत मंगलबार स्पेनिस क्लब एटलेटिको म्याड्रिडले जर्मन क्लब बोरुसिया डर्टमुन्डलाई २-० ले पराजित गरेको छ । समूह ‘ए’ को अघिल्लो खेलमा डर्टमुन्डले एटलेटिकोलाई फराकिलो अन्तरले पराजित गरेको थियो ।

डर्टमुन्डको अपराजित यात्रालाई पूर्णविराम दिने क्रममा एटलेटिकोले घरेलु मैदानमा पुरै समय दबाबमा नै राख्यो । पहिलो हाफको ३३ औं मिनेटमा साउल निगुएजले एटलेटिकोलाई अग्रता दिलाएका थिए । दोस्रो हाफको ८० औं मिनेटमा एन्टोइन ग्रिज्मनले गोल थप्दै जारी सिजनको १५ खेलको अपराजित यात्रामा पूर्णविराम लागेको हो । पछिल्लो खेलमा डर्टमुन्डले एटलेटिकोलाई ४-० ले पराजित गरेको थियो ।

स्टार खेलाडी डिएगो गोडीन र कोकेबिना नै उत्रेको एटलेटिकोले समूहको अंक तालिकामा भने माथि उक्लन सकेन । समान ९-९ अंक बोकेका डर्टमुन्ड र एटलेटिकोमा जर्मन टोली हेड टु हेड नतिजामा भएन अगाडी छ । तेस्रो स्थानमा ४ अंक जोडेको क्लब ब्रुज छ भने पुछारमा थिएरी हेनरीको एएस मोनाको रहेको छ । मोनाकोले मंगलबार ब्रुजको मैदानमा ४-० को फराकिलो हार बेहोरेको हो ।

डर्टमुन्डले शनिबार जर्मन बुन्डेसलिगामा बायर्न म्युनिखको सामना गर्नेछ । च्याम्पियन्स लिगमा भने अब एटलेटिको र डर्टमुन्डले मोनाको र क्लब ब्रुजसँग खेल्नेछन् । दुवै टोलीको दोस्रो चरणमा पुग्ने सम्भावना लगभग तयजस्तो देखिन्छ ।