एजेन्सी – खेलको अन्तिम १२ मिनेटमा कप्तान ह्यारी केनले दुई गोल गरेपछि इंग्लिस क्लब टोटेनहम हट्स्परले च्याम्पियन्स लिगको समूह चरण खेलमा पीएसभी आइन्डोभनलाई २-१ ले पराजित गरेको छ । यस यस जितसँगै स्पर्सको दोस्रो चरणमा पुग्ने सम्भावना जिवितै रहेको छ ।

खेलको दोस्रो मिनेटमा नै पाहुना टोली पीएसभीले अग्रता बनाएको थियो । कप्तान लुक डे योङले कर्नरबाट आएको बललाई हेडरमार्फत गोल गर्दै अग्रता दिलाएका थिए । टोटेनहमले लगातार दबाब बनाएपनि गोलको अवसर सदुपयोग गर्न नसक्दा पहिलो हाफ १-० ले पछाडी रहयो । दोस्रो हाफमा पनि घरेलु टोलीले अपेक्षित सुरुवात पाउन सकेन । पीएसभीका गोलरक्षक जोरिओन जोतले लगातार बचाउ गर्दै पाहुना टोलीको अग्रता कायम राखेका थिए ।

तर ७८ औं मिनेटमा कप्तान ह्यारी केनले गोल गर्दै खेल बराबरीमा ल्याए । उनले फर्नान्डो लोरेन्टेको पासलाई सदुपयोग गर्दै पेनाल्टी क्षेत्रभित्रबाट गरेको प्रहार गोलमा परिणत भयो । एक मिनेट समय बाँकी हुँदा केनले नै टोटेनहमलाई अग्रता दिलाए । उनले बेन डेभिसको क्रसमा गरेको हेडर दुई डिफेन्डरलाई लाग्दै गोलमा परिणत भएको थियो ।

स्पर्सले खेल अवधिभर पीएसभीको पोस्टमा ३० प्रक आक्रमण गरेको थियो । यो टोलीको च्याम्पियन्स लिग इतिहासमै सर्वाधिक प्रहार हो । केनले पछिल्लो १४ च्याम्पियन्स लिग खेलमा १३ गोल र २ असिस्ट प्रदान गरेका छन् । यता पीएसभीले भने सन् २०१५ यता १२ खेलमा जित दर्ता गर्न सकेको छैन ।