म्युनिख (एजेन्सी) – साविकको विजेता बायर्न म्युनिख जर्मन बुन्डेस लिगामा फ्रेइबर्गसँग बराबरीमा रोकिँदा बोरुसिया डर्टमन्डले वल्सबर्गमाथि १–० को झिनो जित निकालेको छ ।

जर्मन बुन्डेसलिगा अन्तरगत शनिबार राति भएको खेलमा बायर्न फ्रेइबर्गसँग १–१ गोलको बराबरीमा रोकिएको हो । बराबरीपछि बायर्नले शीर्ष स्थानमा रहेको डर्टमन्डसँगको अंक दुरी छोट्याउने मौका गुमाएको छ । म्युनिखको १० खेलबाट २० अंक रहँदा शीर्षस्थानमा रहेको डर्टमन्डको समान १० खेलबाट २४ अंक छ ।

म्युनिखको घरेलु मैदान एलिनाज एरिनामा प्रतिस्पर्धात्मक बनेको खेलमा दुवै गोल दोस्रो हाफमा सम्भव भएको थियो । ८०औं मिनेटमा सर्ज ग्नाब्रीको गोलमा घरेलु टोलीले खेलमा अग्रता बनाएको थियो । राफिन्हाको पासमा सर्जले करिब १५ यार्डबाट गोल गर्न सफल भएका थिए । खेल सकिन १ मिनेट बाँकी रहँदा लुकास होलरले गोल गर्दै टिमलाई हारबाट जोगाए । हारतर्फ धकेलिएको खेलमा क्रिस्टियन गन्टरको पासमा लुकासले डि–बक्सभित्रबाट गोल गर्दै खेललाई बराबरीमा ल्याएका थिए ।

शनिबार राति नै भएको अर्काे खेलमा लिगको शीर्षस्थानमा रहेको बोरुसिया डर्टमन्डले वल्सबर्गमाथि १–० को साँघुरो जित निकाल्यो । २७औं मिनेटमा मार्काे रियुसले गरेको गोल नै डर्टमन्डको जितमा पर्याप्त बन्यो । जितपछि शीर्ष स्थानमा रहेको डर्टमन्डले दोस्रो स्थानको म्युनिखसँग ४ अंकको अग्रता लिन सफल भएको छ । शनिबार राति नै आरबी लेपिजिगले हर्था बर्लिनमाथि ३–० को सहज जित निकाल्यो । लेपिजिगको जितमा टिमो वेर्नरले २ तथा म्याथुजले गोल गरे ।