काठमाडौं (हाम्रो खेलकुद)– भारतको सिक्किममा गभनर्स गोल्ड कप च्याम्पियन बनेको सिग्नेचर मनाङ मस्याङ्दी क्लबको टोली आज स्वदेश फर्कदैछ । यसअघि दुई पटक फाइनल खेलेपनि मनाङले गभनर्स गोल्डकप जितेको यो पहिलो पटक हो । दसै तिहारको विदामा उपाधि जित्न सफल भएकोले त्यसले मंसिर १ गतेबाट पुनः सुरु हुने सहिद स्मारक ए डिभिजन लिगमा फाइदा पुग्ने विश्व कप्तान सुजल श्रेष्ठले लिएका छन् ।

‘हामीले यहाँ तीन वटा म्याच खेल्यौं । समग्रमा राम्रो भयौं,’ उनले भने, ‘आशा छ यसले लिगमा पनि फाइदा पुग्नेछ ।’ सुजलको कप्तानीमा मनाङले विदेशी भूमिमा जितेको यो दोस्रो उपाधि हो । यसअघि उनकै कप्तानीमा मनाङले भुटानमा किङ्स कप जितेको थियो । ‘क्लबका लागि यो इतिहास नै भयो,’ उनले खुसी साटे, ‘मलार्ई व्यक्तिगत रुपमा पनि निकै खुसी लागेको छ ।’

पाल्जोर रंगशालामा शनिबार इन्डियन रेड आर्मीलाई १–० ले हराउँदै मनाङले उपाधि जितेको थियो । उपाधिसहित मनाङले २ लाख भारतीय रुपैयाँ प्राप्त गरेको छ । फाइनलमा मनाङका लागि सुजलले खेल सकिन ९ मिनेट बाँकी रहँदा गोल गरेका थिए । घरेलु फुटबलमा ए डिभिजन लिगको विश्रामको अवसरमा सिक्किम पुगेको मनाङले बाई पाएर सोझै क्वार्टरफाइनल खेलको यिथो ।

क्वार्टरफाइनलमा कोलकाता कस्टम्सलाई ४–२ ले हराएको मनाङले कोलकाता एटिकेलाई ६–२ को फराकिलो अन्तरले पराजित गरेको थियो । राष्ट्रिय टोलीका महत्वपूर्ण सदस्य समेत रहेका सुजलले सिक्किममा मनाङले खेलेका सबै ३ खेलमा गरि ४ गोल गरे । क्वार्टरफाइनलमा २ गोल गरेका सुजलले सेमिफाइनलमा पनि १ गोल गरेका थिए । सेमिफाइनलमा डोना थापाले ह्याट्रिक गरेका थिए ।

लिग सुरु भएपछि मनाङले एनआरटीसँग पहिलो खेल खेल्नेछ । ए डिभिजन लिगको साविक विजेता समेत रहेको मनाङले ब्रिगेड ब्वाइज क्लबमाथि जित हासिल गर्दै यसपटकको यात्रा प्रारम्भ गरेको थियो । लिग जित्नु क्लबको मुख्य लक्ष्य रहेको बताउँदै सुजलले भने, ‘लिगमा साना भनिएकै टोलीले बढी चुनौति दिने देखिएको छ । त्यसैले हामीले पनि निकै सम्हालिएर खेल्नुपर्ने अवस्था छ ।’

सुजलको नजरमा मनाङसहित थ्री स्टार, त्रिभुवन आर्मी क्लब र नेपाल पुलिस क्लब लिगका मुख्य दाबेदार हुन् । मनाङ टोली खेलाडी आज सिक्किमबाट सिलगुढी, काकरभिट्टा हुँदै आ आफ्नो घर जाने सुजलले जानकारी दिए । कार्तिक २५ गतेबाट लिगका लागि पुन तयारी सुरु हुने उनले बताए ।