लन्डन (एजेन्सी) – लन्डन क्लब आर्सनल र लिभरपुलले इंग्लिस प्रिमियर लिग फुटबलमा बराबरी खेल्दै अंक बाँडेका छन् ।  प्रिमियर लिग अन्तरगत शनिबार राति भएको खेलमा आर्सनल र लिभरपुलले १–१ गोलको बराबरी खेल्दै अंक बाँडेका हुन् ।

बराबरी पछि लिभरपुल २७ अंकसहित लिगको शीर्ष स्थानमा उक्लिएको छ । लिभरपुलले एक खेल कम खेलेको म्यानचेस्टर सिटीलाई १ अंकले पछि पार्दै लिगको शीर्ष स्थानमा उक्लन सफल भएको हो । सिटीले आज साउथह्याम्पटनसँग प्रतिस्पर्धा गर्दैछ । बराबरीपछि आर्सनल पाचौ स्थानमा झरेको छ । आर्सनलको ११ अ‍ेदबाट २३ अंक छ ।

लिभरपुलका जेम्स मिल्नरले गोल गर्दा आर्सनलका एलेक्स लाकाजेट्टीले बराबरी गोल फर्काएका थिए । आर्सनलको घरेलु मैदान इमिरेट्स स्टेडियममा भएको प्रतिस्पर्धात्मक खेलको पहिलो हाफ गोलरहित बराबरीमा सकिएको थियो । तर, ६१औं मिनेटमा जेम्स मिल्नरले गोल गर्दै घरेलु टोलीविरुद्ध लिभरपुललाई अग्रता दिलाएका थिए । गोलरक्षक लेनोको गलतीमा मिल्नरले गोल गर्न सफल भएका थिए ।

१ गोलले पछि परेपछि आर्सनलले लिभरपुलमाथि दवाव सिर्जना गर्दै ८२औं मिनेटमा बराबरी गोल गर्न सफल भयो । एलेक्स इओवीको पासमा लाकाजेट्टीले गोल गर्दै खेललाई १–१ गोलको बराबरीमा ल्याएका थिए । त्यसपछि थप गोल निस्कन नसक्दा खेल बराबरीमा सकियो ।