हारको मुखबाट बार्सिलोनाको उत्कृष्ट कमब्याक जित

एजेन्सी – स्पेनिस ला लिगाअन्तर्गत शनिबार भएको खेलमा बार्सिलोनाले रायो भालेकानोलाई ३-२ ले पराजित गरेको छ । अन्तिम ३ मिनेटमा दुई गोल गर्दै बार्सिलोनाले महत्त्वपूर्ण ३ अंक हासिल गरेको हो ‌‌।

बार्सिलोनाले खेलको १० अौं मिनेटमा अग्रता लिएको थियो । लुइस सुअारेजले जोर्डी अल्बाक पासमा गोल गर्दै अग्रता दिलाएका थिए ‌। पहिलो हाफको १० मिनेट समय बाँकी रहँदा घरेलु टोली भालेकानोले बराबरी गोल फर्कायो । जोसे पोजोको गोलसँगै पहिलो हाफ १-१ को बराबरीमा टुङ्गिएको थियो ।

दोस्रो हाफमा भालेकानोले अग्रता लियो । ५७ अौं मिनेटमा अल्भारो गार्सियाले गोल गरेपछि बार्सिलोना स्तब्ध बनेको थियो । तर अन्तिम तीन मिनेट समयमा दुई गोल गरेपछि खेलमा बार्सिलोना फर्कियो । ८७ अौं मिनेटमा अोस्मान डेम्बेलेले बराबरी गोल गरेको केहि बेरमै लुइस सुअारेजले विजयी गोल गरे ।

यस नतिजासँगै बार्सिलोना अंक तालिकाको शीर्ष स्थानमा ४ अंकले अगाडी छ । बार्साको ११ खेलमा २४ अंक छ भने एट्लेटिको म्याड्रिड समान खेलमा २० अंकसहित दोस्रो स्थानमा छ । एक खेल कम खेलेको अलाभेस २० अंक सहित तेस्रो स्थानमा छ ।