पेरिस (एजेन्सी)– फ्रान्सेली च्याम्पियन पेरिस सेन्ट जर्मेन (पीएसजी) का फरवार्ड एडिन्सन कभानीले च्याम्पियन्स लिग जित्नका लागि टोलीले अझै एकताबद्ध भएर काम गर्नुपर्ने बताएका छन् । नेयमार, केलियन एमबाप्पे जस्ता स्तरीय खेलाडी हुनका बावजुद पीएसजीले च्याम्पियन्स लिगमा भने सोचे अनुरुपको प्रदर्शन गर्न सकेको छैन ।

नेयमार र एमबाप्पे अघिल्लो सिजन पिएसजीमा आबद्ध भएपनि टोलीले च्याम्पियन्स लिगमा उच्च प्रदर्शन गन सकेन । यो सिजनमा पनि टोलीको प्रदर्शन खासै राम्रो हुन सकेको छैन । काभानीले च्याम्पियन्स लिग जित्नका लागि के गर्नुपर्दछ भन्ने विषयमा आफ्नो भनाई राखेका छन् । ‘मैले सम्झौता गर्नुअघि क्लबले आफ्नो लक्ष्यका बारेमा प्रष्ट पारेको थियो । त्यो मेरो दिमागमा छ । मैले त्यसको सधै सम्मान गरेको छु । म जित्न चाहन्छु , किनकी जितका लागि नै मलाई यहाँ ल्याइएको हो,’ उनले भने ।

काभानीले एट्लेटिको म्याड्रिड र युभेन्ट्सको जस्तै सामूहिक प्रदर्शन पिएसजीले गर्नुपर्नेमा जोड दिएका छन् । ‘त्यसको मतलब अहिले हामीले सामूहिक प्रदर्शन गरेका छैनौं भन्ने होइन,’ काभानीले थपे, ‘हामीले कोशिस गरिरहेका छन् । नेयमार वा एमबाप्पेसँग सहकार्य भएको छैन भनेको होइन । तर हामीले नयाँ प्रशिक्षकका साथ मिलेर अझै सामूहिक प्रदर्शन गर्न आवश्यक छ ।’

च्याम्प्यिन्स लिगको अघिल्लो चरण पुग्ने सम्भावना बलियो बनाउन आउने खेलमा पीएसजीले सफल नतिजा निकाल्नु पर्ने हुन्छ । लिभरपुलसँग पराजित भएको पिएसजी नेपोलीसँग २–२ को बराबरीमा रोकिएको थियो । अर्को एउटा खेल जितेको पिएसजी ४ अंकसहित अंक तालिकाको तेस्रो स्थानमा छ । लिभरपुल (६) पहिलो र नेपाली (५) दोस्रो स्थानमा छ ।