डि ब्रुयन फेरि मैदान बाहिर रहने

लन्डन (एजेन्सी) – इंग्लिस क्लब म्यानचेस्टर सिटी तथा बेल्जियमका प्ले मेकर केभिन डि ब्रुयन फेरि मैदान बाहिर रहने भएका छन् ।

कारवाओ कप अन्तरगत फुलहमविरुद्ध २–० ले जित निकालेको खेल दौरान ब्रुयन खेल सकिन ५ मिनेट बाँकी रहँदा घाइते हुदै मैदान बाहिर जानुपरेको थियो ।

उनी फुलहमका टिमोथी फोसु मेन्साहासँग ठोक्किदा चोट बोक्न पुगेका थिए । उनको बाया खुट्टामा चोट बोकेका थिए । उनी दुई साताअघि मात्रै मैदान फर्किएका थिए । तर, उनको पूनरागमन सुखद रहेन । चोटपछिको ब्रुयनको यो तेस्रो खेल थियो । उनी घुडाको लिगामेन्टमा देखिएको समस्याका कारण दुई महिना मैदान बाहिर रहेका थिए ।

उनले च्याम्पियन्स लिग अन्तरगतको साख्तर डोनेक्सविरुद्धको खेलबाट पुनरागमन गरेका थिए । टोटनहमविरुद्धको जितमा ब्रुयनले वैकल्पिक खेलाडीको रुपमा मैदान प्रवेश गरेका थिए ।

उनको चोट कति गम्भीर हो, त्यसबारे मेडिकल रिपोर्टपछि मात्रै जानकारी हुने बताइएको छ । उनको चोटबारे अहिले डक्टरहरुले परीक्षण गरिरहेका छन् ।
सिटीका प्रशिक्षक पेप ग्वार्डिओलाले ब्रुयनको चोट के कति हो त्यो अहिल्यै भन्न नसकिने बताएका छन् ।