मड्रिड (एजेन्सी) – अन्तरिम प्रशिक्षक सान्टियागो सोलारीको प्रशिक्षणमा मैदान उत्रिएको स्पेनिस जाइन्ट रियल मड्रिडले स्पेनिस कोपा डेल रे अन्तरगतको पहिलो लेगमा तेस्रो डिभिजनको मेलिलामाथि ४-० को सहज जित निकालेको छ ।

मेलिलाको घरेलु मैदानमा बुधबार राति भएको खेलमा रियलले मेलिलामाथि ४–० को सहज जित निकालेको हो । रियलले अपेक्षाकृत प्रदर्शन गर्न नसकेपछि मुख्य प्रशिक्षक जुलियन लुपेटेगुईलाई बर्खास्ती गरेको थियो । त्यसपछि रियलले सोलारीलाई अन्तरिम प्रशिक्षकको जिम्मेवारी दिएको थियो । रियलले सोलारीको पहिलो प्रशिक्षणमा सहज जित निकाल्न सफल भएको हो ।

२८औं मिनेटमा अल्भारो ओर्डिजोलाको पासमा बेन्जेमाको गोलबाट रियलले खेलमा अग्रता बनाएको थियो । पहिलो हाफको इन्जुरी समयमा भेनेसियस जुनियरको पासमा मार्काे एसेन्सियोले गोल गरेपछि रियलले पहिलो हाफमा २–० को अग्रता बनाएको थियो । रियलले दोस्रो हाफमा पनि दुई गोल गर्न सफल भयो ।

७९औं मिनेटमा भेनेसियस जुनियरको पासमा ओर्डिजोलाले गोल गरेपछि रियलले खेलमा ३–० को आरामदायी अग्रता बनाएको थियो । इन्जुरी समयमा ओर्डिजोलाको पासमा क्रिस्टो गोन्जालेजले गोल गर्दै रियललाई ४–० को सहज जित दिलाए ।

दोस्रो लेग ६ डिसेम्वरमा रियलको घरेलु मैदानमा हुनेछ ।