काठमाडौं (हाम्रो खेलकुद)– नेपाललाई एएफसी यू १९ महिला च्याम्पियनसिपको दोस्रो चरणमा पुर्याउन भूमिका निर्वाह गर्ने ३ खेलाडीसहित ५ सदस्य शुक्रबार म्यानमार जाने भएका छन् । राष्ट्रिय टोलीबाट ओलम्पिक छनोट खेल्न म्यानमार जाने यू १९ टोलीकी सदस्यमा अन्जना रानामगर, सरु लिम्बु र मञ्जली कुमारी योञ्जन छन् ।

महिला राष्ट्रिय टोलीकी सहायक प्रशिक्षक भगवती राना मगर र फिजियो जिनी बज्राचार्य पनि म्यानमार जानेछन् । ओलम्पिक छनोटको अन्तिम तयारीका लागि नेपाली महिला सिनियर टोली भने चीनमा रहेको छ । सिनियर टोली पनि शुक्रबार नै म्यानमार पुग्ने अखिल नेपाल फुटबल संघ (एन्फा) ले जनाएको छ ।

थाइल्यान्डमा छनोट चरण खेल्दै नेपाली यू १९ महिला टोली सोमबार स्वदेश आइपुगेको थियो । तीन मध्ये २ खेलमा जित र १ खेलमा हार बेहोरेको नेपाल हेड टु हेडका आधारमा दोस्रो चरणका लागि छनोट भएको थियो । पहिलो खेलमा थाइल्यान्डसँग पराजित भएको नेपालले त्यसपछि भारतलाई २–० र पाकिस्तानलाई ९–० ले हराएको थियो । भारतलाई हेड टु हेडमा पछि पार्दै नेपाल दोस्रो चरणमा पुग्न सफल भएको थियो । नेपाल सम्मिलित ओलम्पिक छनोटको समूहमा भारत, म्यानमार र बंगलादेश रहेका छन् ।

नेपालले ८ नोभेम्बर ८ मा भारत, ११ मा म्यानमार र १३ मा बंगलादेशसँग प्रतिस्पर्धा गर्ने बताइएको छ । नेपालले पहिलो पटक ओलम्पिकको महिला फुटबल छनोटमा भाग लिन लागेको हो । हरि खड्काको मुख्य प्रशिक्षणमा रहेको नेपाली टोलीको अर्का प्रशिक्षक मृगेन्द्र मिश्र छन् । अखिल नेपाल फुटबल संघ (एन्फा) का केन्द्रिय सदस्य दीर्घबहादुर केसी टोली नेता रहेको टोलीको व्यवस्थापकमा हिराचन थकाली छन् ।