टुरिन (एजेन्सी)– युभेन्ट्सले हामेस रोड्रिगुएजलाई रियल म्याड्रिडका पूर्व सहकर्मी क्रिस्टियानो रोनाल्डोसँगै खेलाउने विषयमा सोचिरहेको बताइएको छ । २७ वर्षे प्ले मेकर रोड्रिगुएज सन् २०१७ देखि जर्मन च्याम्पियन बायर्न म्युनिखमा लोनमा रहेका छन् ।

तर, जनवरीको ट्रान्फरमा उनी युभेन्ट्स पुग्न सक्ने चर्चा सुरु भएको छ । जर्मनी पत्रिका स्पोर्टसब्लिडका अनुसार रोड्रिगुएज जनवरीमा बायर्न छाड्न चाहिरहेका छन् । उनी या त ला लिगा या स्थायी रुपमा कुनै क्लब जाने योजनामा छन् । त्यसैले इटालियन क्लबले रोड्रिगुएजलाई क्लबमा भित्राउन प्रयास गर्न सक्ने बताइएको छ ।

जोर्जे मेन्डिस रोड्रिगुएज र रोनाल्डो दुवैका एजेन्ट हुन् । पोर्चुगिज सुपर स्टार रोनाल्डो सिजनको सुरुवातमा रियलबाट १ सय मिलयन पाउन्डमा युभेन्ट्स पुगेका थिए । मेन्डिससँगको राम्रो सम्बन्धका कारण पनि युभेन्ट्सले कोलम्बियन स्टारलाई भित्राउन सम्भावना रहेको बताइएको छ । रोड्रिगुएजले २०१४ को विश्व कपमा उच्च प्रदर्शन गरेपछि उनी रियलको रोजाईमा परेका थिए ।

रोड्रिगुएजलाई भित्राउने सम्भावना रहँदा युभेन्ट्सले टोलीमा अहिले रहेका फरवार्डमध्ये एकलाई बिक्री गर्नुपर्नेछ । बार्यनमा रोड्रिगुएजले ४९ खेलमा ११ गोल गरेका छन् । युभेन्ट्समा रोनाल्डोबाहेक, पाउलो डेबाला, हुवा काउड्राडो मान्डुकिज, डग्लस कोस्टा, फेड्रिको ब्रेनाडेची फरवार्डका रुपमा रहेका छन् । रोड्रिगुएज बाहिरिने विषयमा मेन्डिसले बायर्नसँग कुरा गर्न चाहिरहेको बताइएको छ । यद्दपी बायर्न उनलाई छाड्न तयार नहुने अनुमान गरिएको छ ।