बार्सिलोना (एजेन्सी)– स्पेनिस टोलीका पूर्व सहकर्मी जेरार्ड पिके र सर्जियो रामोसबीच क्लब फुटबलमा निकै तिक्तता रहने गरेको बताइन्छ । रामोस रियल म्याड्रिडका कप्तान हुन् भने पिके बार्सिलोनाका महत्वपूर्ण खेलाडी मध्येका एक हुन् ।

एल क्लासिकोमा यी दुई खेलाडीको चर्चा स्वभाविक रुपमा हुने गरेको छ । तर, खेलका दौरान उच्च प्रतिस्पर्धा भएपनि उनीहरुले एकअर्कालाई आदार गर्ने गरेका छन् । यसै साता नोउ क्याम्पमा भएको एल क्लासिकोमा पिके रामोसको बचाउमा उभिएका छन् । उनले बार्सिलोनाका समर्थकलाई रामोसलाई नजिस्काउन अपिल गरेका थिए ।

यद्दपी बार्सिलोनाका समर्थकले रामोसलाई गिज्जाएका थिए । उनीहरुले रामोसमाथि निकै तल्लो स्तरको गाली दिएका थिए । पिकेले भने समर्थकलाई हुटिङ र अपशब्द प्रयोग नगर्न समर्थकहरुलाई अपिल गरेको इशाराबाट बुझिन्थ्यो ।

समर्थकको त्यस्तै अपमान पिकेले पनि स्पेनबाट खेल्दा अनुभव गर्ने गरेका थिए । क्याटालानको स्वतन्त्रताका पक्षमा आवाज उठाउँदै आएका पिकेलाई समर्थकले आलोचना गर्ने गरेका थिए । त्यो समयमा रामोस पिकेको बचाउमा देखिन्थे । रसिया विश्व कपमा स्पेनको कमजोर प्रदर्शन पछि पिकेले अन्तर्राष्ट्रिय फुटबलबाट सन्यास लिएका थिए । रामोस भने अहिले पनि स्पेनिस टोलीको नेतृत्व गरिरहेका छन् ।