लन्डन (एजेन्सी)– मिडफिल्डर डेले अलीले टोटेनह्यामसँग छ वर्षको सम्झौता थपेका छन् । उनी सन् २०२४ सम्म क्लबमा रहने औपचारिक रुपमा सम्झौता भएको छ ।

२२ वर्षे अलीले सहकर्मी ह्यारी केन, सन ह्यग मिन, इरिक लामोला, केइरन ट्रिपियर र प्रशिक्षका माउरिसियो पिचिन्टोको पदचाप पछ्याएका छन् । सबैले अघिल्लो सिजनको अन्त्यमा सम्झौता लम्बाएका थिए । अलीले नयाँ सम्झौता अनुसार अहिलेको भन्दा झन्डै दोब्बर पारिश्रमिक बुझ्ने बताइएको छ । प्रति साता ५० हजार पाउन्ड लिने गरेका अलीले नयाँ सम्झौता अनुसार १ लाख पाउन्ड पाउनेछन् । अलीकै जस्तो प्रस्ताव क्लबले क्रिस्टियन इरिक्सन, जान भर्टोघन र इरिक डाएरलाई पनि राख्ने बताइएको छ ।

सन् २०१५ मा ५ मिलियन पाउन्डमा टोटेनह्यामबा आबद्ध अलीले आफ्नो खेल जीवनमा निकै प्रगति गरिसकेका छन् । रसिया विश्व कपमा इग्ल्यान्डका लागि उच्च प्रदर्शन गर्ने मध्ये अली पनि एक हुन् । पछिल्लो तीन सिजन सबै प्रतियोगितामा गरि उनले दोहोरो अंकमा गोल गर्दै आएका छन् । पछिल्लो सिजन मिडफिल्डको रक्षात्मक भूमिकामा पनि उनले टोलीका लागि गोल गरेका थिए । स्पर्सका लागि १ सय ५० खेल खेलिसकेका अलीले क्लबका लागि आउने दिनमा अझै महत्वपूर्ण भूमिका निर्वाह गर्ने अपेक्षा गरिएको छ ।