काठमाडौं (हाम्रो खेलकुद)– सिग्नेचर मनाङ मस्याङ्दी क्लब भारतको सिक्किममा जारी गभनर्स गोल्ड कप फुटबल प्रतियोगिताको सेमिफाइनलमा पुगेको छ । 

ग्यान्टोकस्थित पाल्चोर रंगशालामा मंगलबार भारतीय क्लब कोलकाता कस्टम्सलाई ४–२ ले हराउँदै मनाङले अन्तिम चारको यात्रा तय गरेको थियो । मनाङले बिहीबार फाइनल प्रवेशका लागि कोलकाताको एटिकेको सामना गर्नेछ ।

मनाङको जितमा विमल राना र सुजल श्रेष्ठले समान २ गोल गरेका थिए । मनाङ सुजलकै कप्तानीमा मैदान ओर्लिएको थियो । सातौं मिनेटमा विमलले मनाङका लागि पहिलो गोल गरेका थिए । तर २५ औं मिनेटमा आत्मघाती गोल भएपछि खेलमा १–१ को बराबरी भएको थियो ।

मनाङले ६८ औं मिनेटमा दोस्रो पटक खेलमा अग्रता लिएको थियो । दोस्रो गोल पनि विमलले नै गरेका थिए । कोलकाकाले ७७ औं मिनेटमा दोस्रो पटक बराबरी गोल फर्काएको थियो । तर सुजलले ८२ औं मिनेटमा गोल गर्दै टोलीलाई अग्रता दिलाए ।

सुजलले नै इन्जुरी समयको दोस्रो मिनेटमा अर्को गोल थप्दै गोलअन्तरलाई फराकिलो पारे । प्रतियोगितामा सहभागी नेपाली अर्को टोली नेपाल एपिएफ क्लब भने पहिलो खेलबाटै बाहिरिएको थियो ।

मनाङले भने सोझै क्वार्टफाइनलमा प्रवेश पाएको थियो । मनाङका कप्तान सुजलले खेल जित्न कठिन भएको र आउने खेलमा अझै राम्रो प्रदर्शनको अपेक्षा राखेका छन् ।