ओल्डट्राफोर्ड (एजेन्सी) – म्यानचेस्टर युनाइटेडले इंग्लिस प्रिमियर लिग फुटबलमा एभर्टनलाई पराजित गरेको छ । युनाइटेडले एभर्टनलाई २–१ ले पराजित गरेको हो ।

युनाइटेडको जितमा पल पोग्वा र एन्थोनी मार्सियलले गोल गरे । एभर्टनका गिल्फी सिगुर्डसनले सान्त्वना गोल फर्काए ।  घरेलु मैदान ओल्ड ट्राफोर्डमा आइतबार राति भएको खेलमा युनाइटेडले खेलको २७ औं मिनेटमा अग्रता बनाएको थियो । युनाइटेडका पल पोग्वाले पेनाल्टीमार्फत गोल गर्दै अग्रता दिलाएका थिए ।

इड्रिसा गानाले मार्सियललाई डि–बक्समा लडाएपछि युनाइटेडले पेनाल्टीको मौका पाएको थियो । पोग्वाको पहिलो प्रहार एभर्टनका गोलरक्षक जार्डन पिकफोर्डले बचाएपनि रिवाउन्डमा पोग्वाले कुनै गल्ती गरेनन् । पहिलो हाफमा १–० को अग्रता बनाएको युनाइटेडले दोस्रो हाफको शुरुमै अग्रता दोब्बर पा¥यो । ४९औं मिनेटमा पल पोग्वाको पासमा एन्टोनी मार्सियलले गोल गरेका थिए ।

७७औं मिनेटमा गिल्फी सिगुर्डसनले गोल गर्दै खेललाई २–१ को अन्तरमा ल्याउदै खेलमा फर्काउने संकेत देखाएका थिए । तर, त्यसपछि थप गोल निस्कन नसक्दा युनाइटेड २–१ ले  विजयी हुन सफल भयो ।

जितपछि युनाइटेड १७ अंक जोडेर लिगको आठौं स्थानमा उक्लिएको छ । १५अंकसहित एभर्टन नवौं स्थानमा छ ।