एमबाप्पेको गोलमा पीएसजीको अपराजित यात्रा कायमै

मार्सेली (एजेन्सी) – वैकल्पिक खेलाडीको रुपमा मैदान प्रवेश गरेका केलियन एमबाप्पेले गोल गरेपछि पेरिस सेन्ट जर्मेन (पीएसजी) ले फ्रेन्च लिग वान फुटबलमा आफ्नो अपराजित यात्रा कायम राखेको छ ।

लिग वान अन्तरगत आइतबार राति भएको खेलमा मार्सेलीलाई २–० ले पराजित गर्दै पीएसजीले आफ्नो अपराजित यात्रा कायमै राखेको हो । लिग वानमा पीएसजी ११औं खेलसम्म अपराजित छ । पीएसजीलाई जिताउन किलियन एमबाप्पे र जुलियन ड्राक्सलरले गोल गरे । मार्सेलीको घरेलु मैदानमा पीएसजीले गोलका लागि निकै संघर्ष गर्नुपरेको थियो ।

खेललाई आफ्नो नियन्त्रणमा लिएपनि गोल गर्न चुकिरहेको थियो । पहिलो हाफमा गोलरहित बराबरीमा सकिएको थियो । तर, दोस्रो हाफमा मैदानको छिरेको तीन मिनेटपछि नै एमबाप्पेले गोल गर्दै पीएसजीलाई अग्रता दिलाएका थिए । उनी ६२औं मिनेटमा इरिक मोटिङको स्थानमा मैदान प्रवेश गरेका थिए । उनले एन्जल डि मारियाको पासमा गोल गरेका थिए ।

इन्जुरी समयमा जुलियनले नेयमरको पासलाई सदुपयोग गर्दै गोल गर्दै पीएसजीलाई २–० को जित दिलाए । जितपछि पीएसजीको ११ खेलबाट ३३ अंक जोडेको छ । उसले दोस्रा स्थाको लिलेसँग ८ अंकको अग्रता बनाएको छ ।