बार्सिलोना (एजेन्सी) – एल-क्लासिको फुटबल जगतमा सबैभन्दा अपेक्षित र बढी हेरिने फुटबल खेलमध्ये एक हो । करिब १० वर्ष यता यो भिडन्त दुई ऐतिहासिक प्रतिद्वन्दीहरु बीचको प्रतिस्पर्धा मात्र नभई यस पुस्ताको दुई महान् खेलाडी लियोनल मेस्सी र क्रिस्टियानो रोनाल्डो बीचको भिडन्तको रुपमा पनि हेरिने गरिन्थ्यो ।

विश्वकप पश्चात ट्रान्सफर विन्डोमा रोनाल्डोले रियल म्याड्रिड छाड्दै युभेन्टस जादैं रियल समर्थकहरुलाई निराश बनाए । अर्को तर्फ, मेस्सी पनि हातमा चोट बोक्दै मैदान बाहिर रहेकाले खेलमा समावेश नहुने पक्का रहेको छ । त्यसैले यस एल क्लासिकोमा रोनाल्डो र मेस्सी दुवैलाई देखिने छैन ।

रियल म्याड्रिडले सिजनमा निकै खराब सुरुवात गरेको छ । आफूले खेलेका ९ खेलमा रियलले ४ मा मात्र जित हांसिल गरेको छ । ती खेलमा १३ गोल गर्दै ९ गोल खान पुगेको रियल अंक तालिकाको आठौं स्थानमा रहेको छ । रोनाल्डो गुमाएपश्चात आक्रमणमा फितलो देखिएको रियलको रक्षापंक्तिले पनि सोचेअनुरुप प्रदर्शन गर्न सकेको छैन ।

अर्को तर्फ, ९ खेलमा १८ अंक बटुल्न सफल बार्सिलोना अंकतालिकामा १ खेल बढि खेलेको एट्लेटिको म्याड्रिडभन्दा १ अंकके पछाडी रहेको छ । आजको खेलमा बराबरी खेले पनि बार्सिलोनाले पहिलो स्थानमा पुनरागन गर्ने छ । लिगमा २३ गोल गर्न सफल बार्सिलोनाले ११ खान पुगेको छ, जुन एट्लेटिकोभन्दा ६ बढि पनि हो ।

बार्सिलोनाका लागि गोल र असिस्ट दुवैतर्फ मेस्सीले नै सबैभन्दा बढी योग्दान दिएका छन् ।  ७ गोल र ५ असिस्ट गरिसकेका उनलाई गुमाउनु बार्सिलोनाका लागि ठुलै धक्का पनि हो । उनको अनुपस्थितिमा लुइस स्वारेज (४ गोल) र फिलिपे कौटिन्हो (३ गोल) ले गोल गर्ने जिम्मेवारी लिने छन् ।

राफिन्हा, उस्माने डेम्बेले र माल्कममध्ये एक जनाले अग्रपंक्तिको दायां विङ सम्हाल्ने छन् । विश्वकप विजेता सामुयल उम्टिटी पनि घरेलु टोली बार्सिलोनाका लागि चोटका कारण उपलब्ध छैनन् ।

यता, करिम बेन्जेमा (१ गोल), ग्यारेथ बेल (२ गोल) र इस्कोले रियल म्याड्रिडको अग्रपंक्ति सम्हाल्ने छन् । त्यस्तै सामान्य घाइते भएका मार्सेलो सुरुवाती ११ मै रहने अपेक्षा गरिएको छ । पहिलो रोजाईका ड्यानी कार्भाहाल घाइते रहेकाले डिफेन्सको बायांतिर स्पेनकै नाचो खेल्ने देखिन्छ ।

अघिल्लो पटक रियल र बार्साको भिडन्त २-२ मा सकिएको थियो जहां मेस्सी र स्वारेजले बार्साका लागि र रोनाल्डो र बेलले रियलका लागि गोल गरेका थिए । बार्सिलोनाका लागि जितका साथ पहिलो स्थानमा पकड जमाउने मौका रहने छ भने रियल पनि खराब लयलाई पछाडी राख्दै आफ्नो चिरपरिचित प्रतिद्वन्दीलाई हराउंदै लय समात्न चाहन्छ ।

आजका खेलमा फेरी संसारको नजर २ घण्टाका लागि क्याम्पन्युमा विश्वस्तरीय प्रतिभाहरु र ऐतिहासिक प्रतिद्वन्दीमा अडिने छ जहां नयां नायकहरु उदाउने मौका रहने छ । तर रोनाल्डो र मेस्सी दुवैको अनुपस्थितिमा यस अवसरको भव्यता भने अलिकति खल्लो पक्कै रहने छ ।

खेल नेपाली समय अनुसार रातिको ९ बजे सुरु हुने छ ।