एजेन्सी – लेस्टर सिटीका थाई मालिक विचाई श्रीवद्धनाप्रभाको हेलिकप्टर क्लबको रंगशाला परिसरमा दुर्घटनाग्रस्त भएको छ । शनिबार भएको वेस्ट ह्याम युनाइटेडविरुद्धको १-१ को बराबरीपछि हेलीकप्टर दुर्घटनामा परेको हो ।

खेल सकिएको एक घण्टापछि मैदानको बीच भागबाट नै हेलिकप्टर उडेको थियो । उक्त हेलिकप्टरमा कोको चढेका थिए भन्ने पुष्टि भइसकेको छैन । यद्यपी मालिक विचाई पनि खेल हेर्न मैदान नै पुगेको भने पुष्टि भएको छ । हेलीकप्टरमा को थिए भन्ने अधिकारिक सूचना भने अझै प्राप्त भएको छैन ।

हेलिकप्टर दुर्घटना हुने बितिक्कै क्लबका गोलरक्षक क्यास्पर स्माइकल पनि दुर्घटनास्थल तर्फ कुदेका थिए । प्रत्यक्षदर्शीका अनुसार हेलिकप्टर एक्कासी बन्द भएर आकाशमा घुम्दै कार पार्कमा बजारिएको थियो । वरपर रहेका प्रहरीले हेलिकप्टरको सिसा फोड्न खोज्दा एक्कासी आगो लगेर पड्कदा कसैलाई बचाउन सकिएको थिएन । यद्यपी यसबारे आधिकारिक सूचना अझै प्राप्त भएको छैन ।

मालिक विचाईले लेस्टरको स्वरुप फेर्न मुख्य भूमिका खेलेका थिए । क्लबले सन् २०१६ मा प्रिमियर लिग उपाधि जित्दा उनले प्रत्यक खेल मैदानमा आएर हेर्थे । उनले सन् २०१० क्लब किनेयता लगातार राम्रो प्रदर्शन गरेका थिए । सन् २०१४ मा प्रिमियर लिगमा उक्लिएको लेस्टरले त्यसको दुई वर्षमा नै उपाधि जितेको थियो ।