लन्डन (एजेन्सी) – कार्डिफ सिटीलाई पराजित गर्दै लन्डन क्लब लिभरपुल इंग्लिस प्रिमियर लिग फुटबलको शीर्ष स्थानमा उक्लिएको छ ।  प्रिमियर लिग अन्तरगत शनिबार राति भएको खेलमा लिभरपुलले कार्डिफ सिटीलाई ४–१ ले पराजित गरेको हो ।

घरेलु मैदानमा लिभरपुललाई जिताउन साडियो मानेले २ तथा मोहम्मद सलाह र जद्रान शाकिरीले समान १ गोल गरे । पराजित टोलीका लागि कल्लुम पिटर्सनले सान्त्वना गोल फर्काए ।

घरेलु मैदान एनफिल्डमा लिभरपुलले खेलको १०औं मिनेटमा मोहम्मद सलाहको गोलबाट खेलमा अग्रता बनाएको थियो । पहिलो हाफमा १–० को अग्रता बनाएको लिभरपुलले दोस्रो हाफमा उच्च प्रदर्शन गर्दै थप ३ गोल गर्न सफल हुदा एक गोल खान पुगेको थियो ।

६६औं मिनेटमा साडियो मानेले गोल गरेपछि लिभरपुलले खेलमा २–० को अग्रता बनाएको थियो । ७७औं मिनेटमा कार्डिफका कल्लुमले गोल गर्दै खेललाई २–१ को स्थितिमा ल्याएका थिए ।

तर, लिभरपुलले ८४औं मिनेटमा जद्रान शाकिरीले गोल गरेपछि लिभरपुलले खेलमा ३–१ को अग्रता लिन सफल भयो । त्यसको तीन मिनेटपछि साडियो मानेले टिमको लागि चौथो तथा व्यक्तिगत दोस्रो गोल गर्दै लिभरपुललाई ४–१ को सहज जित दिलाए ।

जितपछि लिभरपुल लिगको शीर्ष स्थानमा उक्लिएको छ । लिभरपुलले एक खेल कम खेलेको म्यानचेस्टर सिटीलाई तीन अंकले पछि पारेको हो । कार्डिफ ५ अंकसहति लिगको १७औं स्थानमा छ ।

प्रिमियर लिगको अन्य खेलमा वाट्फोर्ड, एएफसी बर्नमाउथ र ब्राइटन होभ अल्वियोनले जित निकाल्दा साउथह्याम्पटन र न्यु क्यास्टल युनाइटेडले गोलरहित बराबरी खेल्दै अंक बाँडे ।

वाट्फोर्डले हडर्सफिल्ड टाउन र बर्नमाउथले फुलहमलाई समान ३–० ले पराजित गरेको हो । ब्राइटनले वल्भरह्याम्पटनमाथि १–० को कठिन जित निकालेको हो ।