एजेन्सी – यूईएफए युरोपा लिग अन्तर्गत बिहीबार भएको खेलमा स्पेनिस क्लब सेभिल्लाले अखिसार्सपारलाई ६-० ले पराजित गरेको छ । सेभिल्लाले दुवै हाफमा ३-३ गोल गरेको थियो ।

खेलको सातौं मिनेटमा रोके मेसाले सेभिल्लालाई अग्रता दिलाएका थिए । उनले लुइस मुरिएलको पासमा गोल गरे । लगत्तै सेभिल्लाले पेनाल्टी पायो र पाब्लो सराबियाले कुनै गल्ति गरेनन् । मिलान लुकासको आत्मघाती गोलमा सेभिल्लाले पहिलो हाफमा ३-० को अग्रता बनायो । दोस्रो हाफमा लुइस मुरिएल, क्विंसी प्रोमेस र ग्याब्रिएल मर्साडोले गोल गरेका थिए ।

प्रतियोगिताअन्तर्गत समूह ए मा लार्नाका र लुडोगोरेटस १-१ को बराबरीमा रोकिँदा ज्युरीचले बायर लेभरकुसनलाई ३-२ ले हरायो । समूह बी मा आरबि लेप्जिगले सेल्टिकलाई २-० तथा साल्ज्बर्गले रोजनबर्गलाई ३-० ले पराजित गरे । कोपेनहेगन घरेलु मैदानमा स्लाभिया प्रागसँग १-० ले पराजित हुँदा जेनिटले बोर्ड़ोलाई २-१ ले हरायो ।

आन्द्रेलेक्ट र फेनेरबासे २-२ को बराबरमा रोकिंदा डिनामो जाग्रेडले स्पार्टाक ट्रानाभालाई २-१ ले हरायो । काराबग घरेलु मैदानमा भोर्स्क्लासँग १-० ले हार्दा लिस्बनले पनि आर्सनलसँग सोहि स्कोरमा नतिजा सुम्पियो । रियल बेटिसले मिलानलाई २-१ ले हरायो भने ओलाम्पियाकोसले डुडेलान्जलाई २-० ले पाखा लगायो ।

रेन्जर्स र स्पार्टाक मस्को गोलरहित बराबरीमा रोकिँदा भिल्लारियलले रापिड वेनलाई ५-० ले हरायो । फ्रान्कफर्टले लिमासोललाई २-० तथा लाजियोले मार्सेलाई ३-१ ले हराए । जेंकले बेसिक्तासलाई ४-२ले हराउँदा सार्प्सबोर्ग र माल्मो १-१ को बराबरीमा रोकिए । स्टान्डर्ड लिएजले क्राजोन्डारलाई २-१ ले हरायो ।

जब्लोनेक र अस्ताना १-१ को बराबरीमा रोकिँदा डिनामो किएभले रेन्नेसलाई २-१ ले हरायो । चेल्सीले बाटेलाई ३-१ तथा भिडीले पओकलाई २-० ले हराए ।