लन्डन (एजेन्सी) – रुवेन लफ्टस चिकको ह्याट्रिक मद्दतमा इंग्लिस क्लब चेल्सीले युइएफए युरोपा लिग फुटबलमा वेट बरिसोभलाई पराजित गरेको छ । चेल्सीले बरिसोभलाई ३–१ ले पराजित गरेको हो ।

बरिसोभका एलेक्सी रियोसले एक गोल फर्काए । घरेलु मैदान स्टामफोर्ड ब्रिजमा चेल्सीले खेलको दोस्रो मिनेटमा अग्रता लिएको थियो । डेभिड जापाकोस्टाको पासमा रुवेन लफ्टसले गोल गर्दै चेल्सीलाई अग्रता दिलाएका थिए । तुलनात्मक रुपमा कमजोर प्रतिद्धन्द्धीविरुद्ध लफ्टसले आठौं मिनटमा व्यक्तिगत दोस्रो तथा टिमका लागि दोस्रो गोल गर्न सफल भए । यसपटक लफ्टसले विलियनकोे पासलाई सदुपयोग गरे ।

पहिलो हाफमा २–० को अग्रता लिएको चेल्सीले दोस्रो हाफमा १ गोल गर्न सफल हुदा एक गोल खान पुग्यो । ५४ औं मिनेटमा लफ्टसले गोल गर्दै ह्याट्रिक पूरा गरे । ७९ मिनेटमा एलेक्सी रियोसले एक गोल गर्दैै बरिसोभलाई खेलमा फर्काउने संकेत दिएपनि बरिसोभ ३–१ ले पराजित हुन पुग्यो ।
जितपछि चेल्सी ९ अंक जोडेर समूह ‘एल’ मा शीर्ष स्थानमा रहेको छ । चेल्सी समूहमा अपराजित छ । चेल्सीसँग पराजित बरिसोभ समूहमा ३ अंकसहित पुछारमा झरेको छ ।

यही समूहको अर्काे खेलमा भिडी एफसीले पाओक एफसीलाई २–० ले पराजित गर्दै समूहमा पहिलो जित निकालेको छ । जितपछि भिडी समुहमा तेस्रो स्थानमा उक्लिएको छ । भिडीसँग पराजित पाओक गोल अन्तरमा दोस्रो स्थानमा रहेको छ ।