आर्सनल लगातार ११ औं खेलमा विजयी

एजेन्सी – इंग्लिस क्लब आर्सनलले युरोपा लिगमा बुधबार सपोर्टिङ लिस्बनलाई १-० ले पराजित गर्दै लगातार ११ औं जित दर्ता गरेको छ । आर्सनलको जितमा ड्यानी वेलबेकले एकमात्र गोल गरे ।

खेलको ७७ औं मिनेटमा डिफेन्डर सबास्टियन कोआटेसको गल्तिको फाइदा उठाउँदै वेलबेकले गोलरक्षकको खुट्टामुनिबाट गोल गरेका थिए । त्यसअघि वेलबेकले हेडरमार्फत गोल गरेपनि रेफ्रीले डिफेन्डरलाई धकेलेको भन्दै उक्त गोललाई मान्यता दिएका थिएनन् । खेलको अधिकांश समय बलमा पकड राखेपनि आक्रमणमा भने आर्सनल फितलो देखिएको थियो ।

यस नतिजासँगै आर्सनलले लगातार ११ औं जित दर्ता गरेको छ । अक्टोबर २००७ यता टोलीको यो उत्कृष्ट नतिजा हो । त्यसबेला आर्सनल लगातार १२ औं जित दर्ता गर्न सफल रहेको थियो । आर्सनलले पोर्चुगलमा ६ खेलपछि जित दर्ता गर्यो । यसअघि ३ खेलमा बराबरी र ३ खेलमा हार बेहोरेको थियो । आर्सनलले यस सिजन गरेको ३३ गोलमध्ये २३ गोल दोस्रो हाफमा गरेको छ ।

अंक तालिकामा आर्सनल ३ खेलमा ९ अंक सहित शीर्ष स्थान छ । दोस्रो स्थानको लिस्बनले ३ खेलमा ६ अंक जोडेको छ भने तेस्रो मा रहेको भोर्स्क्लाको ३ खेलमा ३ अंक छ ।