कर्ण लिम्बु घरेलु फुटबलमा चिर परिचित नाम हो, लिग तथा मोफसलमा हुने प्रतियोगिताहरुमा उनको चर्चा निकै हुन्छ र उनले बिरलै समर्थकहरुलाई निराश पार्ने गरेका छन्| यति हुँदाहुँदै पनि राष्ट्रिय टोलीमा भने उनको नाम पटक पटक छुटेको पाइन्छ|

राष्ट्रिय टोलीबाट एकमात्र खेल खेलेका कर्ण, साफ च्याम्पियनशिप अन्तर्गतको छनोटमा अन्तिम २७मा परेर पनि अटाउन सकेका थिएनन्| यसअघी पनि उनको नाम प्रारम्भिक छनोटमा पर्ने तर अन्तिम टोलीमा नपर्ने भइरहेको थियो|

२०६१ सालमा मछिन्द्र क्लबबाट व्यवसायिक फुटबल खेल्न थालेका कर्णले २०६२ साल युनाईटेड क्लब र ६३ साल एन.आर.टि. बाट खेले| २०६६ सालमा पुन: लिग सुरु भएपछि मछिन्द्र पुगेका कर्णले २०६७ सालमा जावलाखेल बाट खेल्दै तेश्रो स्थानमा पुर्याएका लिम्बुले ०६९ सालमा मछिन्द्रलाई निकै राम्रो नतिजासम्म पुर्याउन प्रेरित गरे| झापा एघार राष्ट्रिय लिग खेल्ने भएपछि कर्णले त्यहाँ पनि आफ्नो छाप छोड्न सफल रहे|

लिग फुटबलमा निरन्तर राम्रो प्रदर्शन गर्दै आएका लिम्बु झापा एघारले एन्फा कपको उपाधि उचाल्दा पनि महत्वपूर्ण भूमिका खेलेका थिए| अन्य मोफसलका प्रतियोगिताहरुमा पनि उनले राम्रो खेल पस्किदै गोल गर्दै आएका छन्| निरन्तर राम्रो प्रदर्शन गर्नका वाबजुद पनि राष्ट्रिय टोलीमा नपर्नाले उनले समर्थक माझ पनि छुट्टै स्थान बनाएका छन्| विगतको समयमा रराष्ट्रिय टोलीमा गोलको खडेरी पर्दा पनि घरेलु फुटबलमा राम्रो प्रदर्शन गर्ने लिम्बु टोलीमा नपरेकाले समर्थक हरुमा आक्रोश देखिन्थ्यो|

तर, २०१६मा भएको बंगबंधु र दक्षिण एसियाली फुटबलको उपाधिसंगै नेपालले नवयुग श्रेष्ठको नाममा उत्कृष्ट फरवार्ड पाएको छ| उनीसंगै, बिमल घर्ति मगर र अन्जन बिष्ट पनि उत्तिकै राम्रा छन्| तर, अन्जन र बिमल युरोपमा जाने तरखरमा रहेकाले मलेसिया जाने टोलीमा उनीहरु नपर्ने लगभग पक्का छ|

साफमा राष्ट्रिय टोलीको नेतृत्व गरेका अनिल गुरुङ्ग फर्ममा देखिएका छैनन्| मोफसलमा भएका प्रतियोगिताहरुमा फितलो प्रदर्शन गरेका गुरुङ्ग साफमा पनि फर्ममा थिएनन्| लिम्बुको आशलादो खेल कौशलको अगाडी गुरुङ्गले धेरै मेहेनत गर्नुपर्ने देखिन्छ| यो समयमा आफ्नो स्थान पक्का पारेर मौकाको फाइदा उठाउन सके लिम्बुको ढिलै भएपनि राष्ट्रिय टोलीमा खेल्ने सपना पुरा हुने देखिन्छ|