पेरिस (एजेन्सी) – युइएफए च्याम्पियन्स लिग अन्तर्गत बुधबार राति फ्रेन्च लिग वान क्लब पेरिस सेन्ट जर्मेन (पीएसजी) ले इटालियन क्लब एस एससी नेपोलीको सामना गर्दैछ ।  खेल पीएसजीको घरेलु मैदान पार्क डि प्रिन्सेस पेरिसमा बुधबार राति १२ः४५ बजेपछि शुरु हुुनेछ ।

यी दुई टोली सन् १९९२–९३ को युइएफए कपपछि पहिलोपटक खेल्न एक आपसमा खेल्न लागेका हुन् । त्यतिबेला पीएसजीले नपोलीमाथि २–० को जित निकालेको थियो । च्याम्पियन्स लिगमा भने पीएसजीले २००१ पछि पहिलोपटक इटालियन प्रतिद्धन्द्धीसँग खेल्न लागेको हो । च्याम्पियन्स लिगमा पीएसजीले इटालियन प्रतिद्धन्द्धीलाई अहिलेसम्म पराजित गर्न सकेको छैन । त्यसैले पनि विश्वस्तरीय खेलाडी सम्मिलित पीएसजी नपोलीविरुद्ध सचेत भएर मैदान उत्रनेछ ।

पीएसजीसँग अग्रपङ्तिमा विश्वका महँगा खेलाडी नेयमार जुनियर, केलियन एमबाप्पे र एडिन्सन काभानी जस्ता खेलाडीहरु रहेका छन् । यता, नपोली पनि कमजोर प्रतिद्धन्द्धी हैन । समूहमा नपोली अपराजित रहँदा पीएसजीले लिभरपुलसँग ३–२ को हार बेहारेको थियो । समूह ‘सी’ मा नपोली दुई खेलबाट ४ अंक जोडेर शीर्ष स्थानमा रहँदा पीएसजी ३ अंकसहति दोस्रो स्थानमा छ ।

खेलको जानकारीः

खेलः पीएसजी विरुद्ध एस एस सी नपोली

प्रतियोगिताः युइएफए च्याम्पियन्स लिग

मितिः अक्टोबर २४, २०१८ बुधबार

समयः नेपाली समयअनुसार मध्यरात १२ः४५ बजे (बिहिबार बिहान)