साख्तरमाथि म्यानचेस्टर सिटीको सहज जित

डोनेस्क (एजेन्सी) – इंग्लिस क्लब म्यानचेस्टर सिटीले युइएफए च्याम्पियन्स लिग फुटबलमा युक्रेनी क्लब साख्तर डोनेक्समाथि सहज जित निकालेको छ ।

सिटीले साख्तरमाथि उसकै मैदानमा ३–० को सहज जित निकालेको हो । सिटीको जितमा डेभिड सिल्भा, एमारिक लापोर्टे र बर्नाडो सिल्भाले गोल गरे ।

सिटीले डेभिड सिल्भाको गोलबाट खेलको ३०औं मिनेटमा अग्रता लिएको थियो । त्यसको ५ मिनेटपछि एमारिक लापोर्टेले गोल गरेपछि सिटीले पहिलो हाफमा २–० को अग्रता बनाएको थियो ।

७१औं मिनेटमा बर्नाडो सिल्भाले रियाद महारेजको पासमा गोल गरेपछि सिटीले ३–० को सहज जित निकाल्न सफल भयो ।

जितपछि समूह ‘एफ’ मा सिटीको ३ खेलबाट ६ अंक पुगेको छ । सिटीसँग पराजित साख्तर २ अंक जोडेर पुछारमा छ ।

मंगलबार राति नै भएको खेलमा लियोन र टिएसजी होफेनहेनले ३–३ गोलको बराबरी खेल्दै अंक बाँडेका थिए ।

च्याम्पियन्स लिगका अन्य खेलका नतिजाहरु
समूह ‘ईं’
एइके एथेन्स विरुद्ध बायर्न म्युनिख (०–२)
आयाक्स विरुद्ध बेन्फिका (१–०)
समूह ‘एच’
योङ ब्वाइज विरुद्ध भ्यालेन्सिया (१–१)